વીરતા અને લાંબા સમયની વિશિષ્ટ સેવા બદલ થશે સન્માન
ગાંધીનગરઃ સ્વતંત્રતા દિવસ-2026 નિમિત્તે પોલીસ સેવામાં વિશિષ્ટ કામગીરી અને લાંબા સમયની ઉત્કૃષ્ટ સેવા બદલ આપવામાં આવતા President’s Medal for Distinguished Service (PSM) માટે ગુજરાતના કુલ 19 પોલીસ અધિકારી-કર્મચારીઓની પસંદગી કરવામાં આવી છે.
ગુજરાતમાંથી પસંદ થયેલા 19 પોલીસકર્મીઓમાં એડિશનલ ડિરેક્ટર જનરલ કક્ષાના એક અધિકારી, ડેપ્યુટી સુપરિન્ટેન્ડેન્ટ કક્ષાના એક અધિકારી, એક પોલીસ ઈન્સ્પેક્ટર, બે આર્મ્ડ પોલીસ સબ ઈન્સ્પેક્ટર/સબ ઈન્સ્પેક્ટર ઉપરાંત સબ ઈન્સ્પેક્ટર, આસિસ્ટન્ટ સબ ઈન્સ્પેક્ટર અને હેડ કોન્સ્ટેબલ કક્ષાના કર્મચારીઓનો સમાવેશ થાય છે.
સ્વતંત્રતા દિવસ નિમિત્તે જાહેર કરાયેલી President’s Medal for Distinguished Serviceની રાષ્ટ્રીય યાદીમાં દેશના વિવિધ રાજ્યો અને કેન્દ્રશાસિત પ્રદેશોના પોલીસ અધિકારીઓ તથા કર્મચારીઓનો સમાવેશ કરવામાં આવ્યો છે. ગુજરાતના 19 પોલીસકર્મીઓને મળનાર આ સન્માન તેમની લાંબા સમયની વિશિષ્ટ, સમર્પિત અને ઉત્કૃષ્ટ પોલીસ સેવાની નોંધ તરીકે જોવામાં આવી રહ્યું છે.
કયા કાર્ય માટે કયો મેડલ?
પોલીસ મેડલમાં વીરતા મેડલ દુર્લભ અને અસાધારણ બહાદુરીભર્યા કાર્ય બદલ આપવામાં આવે છે. જીવન કે સંપત્તિ બચાવવા, ગુનાને અટકાવવા અથવા ગુનેગારોને પકડવા દરમિયાન દર્શાવેલી અસાધારણ વીરતાને આ સન્માન માટે ધ્યાનમાં લેવામાં આવે છે. અધિકારી કે કર્મચારીની ફરજ અને જવાબદારીને ધ્યાનમાં રાખીને કામગીરી દરમિયાન રહેલા જોખમનું પણ મૂલ્યાંકન કરવામાં આવે છે.
જ્યારે President’s Medal for Distinguished Service (PSM) પોલીસ સેવામાં લાંબા સમય દરમિયાન વિશિષ્ટ અને ઉત્કૃષ્ટ સેવા રેકોર્ડ ધરાવતા અધિકારી-કર્મચારીને આપવામાં આવે છે.
આ ઉપરાંત Medal for Meritorious Service (MSM) કર્તવ્યનિષ્ઠા, સમર્પણ અને મૂલ્યવાન સેવામાં નોંધપાત્ર કામગીરી બદલ આપવામાં આવે છે.
આ રીતે સ્વતંત્રતા દિવસ-2026ના અવસરે ગુજરાતના 19 પોલીસ અધિકારી-કર્મચારીઓનું રાષ્ટ્રપતિ પોલીસ મેડલથી સન્માન થવા જઈ રહ્યું છે, જે રાજ્યની પોલીસ સેવામાં તેમની વિશિષ્ટ કામગીરીની રાષ્ટ્રીય સ્તરે નોંધ ગણાશે.
