364 પાર્ટી પ્લોટ, 2,727 જાહેર ગરબા અને 16,527 સ્થળોએ શેરી ગરબા યોજાશે; મહિલાઓની સુરક્ષા અને અસામાજિક તત્ત્વો પર નજર રાખવા વિશેષ વ્યવસ્થા
ગુજરાતમાં નવરાત્રિ પર્વનો પ્રારંભ થતાં જ રાજ્યભરમાં ગરબાની રમઝટ જામશે. પરંપરાગત ગરબીથી લઈને આધુનિક ગરબા મહોત્સવો સુધી લાખો ખેલૈયાઓ ઉત્સવમાં જોડાશે. આ દરમિયાન શાંતિ અને સુરક્ષા જળવાઈ રહે તે માટે રાજ્ય સરકારે પોલીસ તંત્રને સતર્ક રહેવા સૂચના આપી છે. નાયબ મુખ્યમંત્રી હર્ષ સંઘવીના માર્ગદર્શન હેઠળ રાજ્યભરમાં થ્રી-લેયર સુરક્ષા વ્યવસ્થા ગોઠવવાનું આયોજન કરવામાં આવ્યું છે.
આયોજન મુજબ રાજ્યમાં 364 પાર્ટી પ્લોટ, 2,727 જાહેર ગરબા અને 16,527 સ્થળોએ શેરી ગરબાનું આયોજન થવાનું છે. મોટી સંખ્યામાં લોકો એકત્રિત થવાના હોવાથી રાજ્ય પોલીસ વડા જ્ઞાનેન્દ્રસિંહ મલિકે જિલ્લા પોલીસ વડાઓ અને પોલીસ કમિશનરોને પેટ્રોલિંગ વધારવા તથા સંવેદનશીલ વિસ્તારોમાં વિશેષ તકેદારી રાખવા સૂચના આપી છે.
મહિલાઓ અને યુવતીઓની સુરક્ષા માટે ગરબા સ્થળો, પાર્ટી પ્લોટ, બજારો અને ભીડભાડવાળા વિસ્તારોમાં મહિલા પોલીસકર્મીઓ તૈનાત રહેશે. સાદા કપડાં અને ગણવેશમાં પોલીસની ટીમો ઉપરાંત શી-ટીમ દ્વારા પણ સતત દેખરેખ રાખવામાં આવશે. છેડતી, અસભ્ય વર્તન કે અન્ય પ્રકારની હેરાનગતિ કરનારાઓ સામે કાયદેસરની કાર્યવાહી કરવામાં આવશે.
સોશિયલ મીડિયા મારફતે અફવા ફેલાવવી, ધાર્મિક લાગણી દુભાવતી સામગ્રી પ્રસારિત કરવી કે સામાજિક સૌહાર્દને નુકસાન પહોંચાડવાના પ્રયાસો સામે સાયબર ક્રાઇમ પોલીસ પણ સતર્ક રહેશે. ગરબા આયોજકોને પ્રવેશ અને બહાર નીકળવા માટે અલગ ગેટ, CCTV કેમેરા, મેટલ ડિટેક્ટર અને અન્ય સુરક્ષા વ્યવસ્થા રાખવા સૂચના આપવામાં આવી છે.
પોલીસ તંત્ર દ્વારા નાગરિકોને પણ અપીલ કરવામાં આવી છે કે ગરબા દરમિયાન કોઈ શંકાસ્પદ હિલચાલ જણાય તો તાત્કાલિક સ્થાનિક પોલીસને જાણ કરે. સુરક્ષા વ્યવસ્થામાં સહકાર આપીને નવરાત્રિનો પર્વ શાંતિપૂર્ણ અને સલામત રીતે ઉજવવા અપીલ કરવામાં આવી છે.
