શાળાના આચાર્યને પુત્રીના પ્રવેશની લાલચ આપી છેતરપિંડી; સોશિયલ મીડિયા રીલ્સ દ્વારા કન્સલ્ટન્સીનો સંપર્ક, સાયબર ક્રાઈમ બ્રાન્ચે તપાસ હાથ ધરી
અમદાવાદ: સરકારી મેડિકલ કોલેજમાં MBBSમાં પ્રવેશ અપાવવાના બહાને અમદાવાદમાં એક શાળાના આચાર્ય સાથે રૂ. 22.75 લાખની છેતરપિંડી થયાનો કિસ્સો સામે આવ્યો છે. આરોપીઓએ BJ મેડિકલ કોલેજના નામે બનાવટી એલોટમેન્ટ લેટર અને અન્ય દસ્તાવેજો આપીને નાણાં પડાવ્યા હોવાનો આક્ષેપ છે. દસ્તાવેજોની ખરાઈ કરાવતાં સમગ્ર મામલો સામે આવ્યો હતો. આ અંગે સાયબર ક્રાઈમ બ્રાન્ચે ફરિયાદના આધારે ગુનો નોંધી તપાસ શરૂ કરી છે.
સોશિયલ મીડિયા રીલ્સથી કન્સલ્ટન્સીનો સંપર્ક
ફરિયાદી સતીશ પટેલ એક શાળામાં આચાર્ય તરીકે ફરજ બજાવે છે. તેમની 17 વર્ષની પુત્રીએ વિજ્ઞાન પ્રવાહમાં ધોરણ-12 પાસ કર્યા બાદ NEETની પરીક્ષા પણ પાસ કરી હતી. આ દરમિયાન સોશિયલ મીડિયા પર તેમને ‘PIXEL MBBS’ નામની કન્સલ્ટન્સીની રીલ્સ જોવા મળી હતી, જેમાં સરકારી મેડિકલ કોલેજમાં પ્રવેશ અપાવવામાં મદદ કરવાનો દાવો કરવામાં આવ્યો હતો.
ફરિયાદ મુજબ, જુલાઈ 2026માં જાહેરાતમાં આપેલા નંબર પર સંપર્ક કરતાં ગોપાલ ભારદ્વાજ નામના શખસે વાતચીત કરી હતી. તેણે રૂ. 30 લાખમાં પ્રવેશની વ્યવસ્થા કરી આપવાની ઓફર કરી હતી. આરોપીએ સેન્ટ્રલ ગવર્નમેન્ટ નોમિની ક્વોટા, મેડિકલ કાઉન્સેલિંગ કમિટી (MCC) અને આરોગ્ય મંત્રાલયના માધ્યમથી પ્રવેશ અપાવી શકાશે એવો દાવો કર્યો હોવાનું ફરિયાદમાં જણાવાયું છે.
11 વ્યવહારોમાં રૂ. 22.75 લાખ પડાવ્યાનો આક્ષેપ
ફરિયાદ અનુસાર, ગોપાલ ભારદ્વાજ અને પંકજસિંહ રાજપૂતે વોટ્સએપ મારફતે દસ્તાવેજો અપલોડ કરવા અને નોંધણી માટે લિંક્સ મોકલી હતી. ત્યારબાદ સર્વિસ બોન્ડ માટે રૂ. 4.5 લાખ, અન્ય વિદ્યાર્થીની સીટ પુત્રીના નામે ટ્રાન્સફર કરવાના બહાને રૂ. 5 લાખ અને એલોટમેન્ટ લેટર તથા નેશનલ મેડિકલ કમિશન (NMC)ના નો-ઓબ્જેક્શન સર્ટિફિકેટ (NOC)ના નામે અલગ-અલગ હપ્તામાં નાણાં લેવામાં આવ્યા હોવાનો આક્ષેપ છે.
ફરિયાદમાં જણાવ્યા મુજબ, 9 ઓગસ્ટથી 1 ઓક્ટોબર, 2026 દરમિયાન ‘PIXEL Education Service’ના ખાતા સહિત વિવિધ UPI આઈડી અને બેંક ખાતાઓમાં કુલ 11 વ્યવહારો દ્વારા રૂ. 22.75 લાખ ટ્રાન્સફર કરાવવામાં આવ્યા હતા. આ માટે રસીદો અને ઈમેલ પણ મોકલવામાં આવ્યા હતા.
પ્રવેશ માટે આપવામાં આવેલા દસ્તાવેજોની ખરાઈ કરતાં એલોટમેન્ટ લેટર બનાવટી હોવાની શંકા સામે આવી હતી. ત્યારબાદ સમગ્ર મામલે સાયબર ક્રાઈમ બ્રાન્ચનો સંપર્ક કરવામાં આવ્યો હતો. પોલીસે ફરિયાદના આધારે તપાસ શરૂ કરી છે અને નાણાં કયા ખાતાઓમાં ટ્રાન્સફર થયા હતા તેમજ આ કથિત છેતરપિંડીમાં અન્ય કોઈની સંડોવણી છે કે કેમ તે અંગે તપાસ હાથ ધરી છે.
