જગદીશ વિશ્વકર્માનો AAP પર પ્રહાર, ચૂંટણીનાં પરિણામોની સમીક્ષા કરવાની પણ જાહેરાત
ગાંધીનગર મહાનગરપાલિકામાં ભાજપની જીત બાદ કમલમ ખાતે વિજયોત્સવ યોજાયો હતો. આ પ્રસંગે મુખ્યમંત્રી ભૂપેન્દ્ર પટેલ, નાયબ મુખ્યમંત્રી હર્ષ સંઘવી, પ્રદેશ પ્રમુખ જગદીશ વિશ્વકર્મા સહિત પક્ષના અગ્રણીઓ ઉપસ્થિત રહ્યા હતા. ગાંધીનગર મનપા, ઓખા નગરપાલિકા અને અન્ય પેટાચૂંટણીઓમાં મળેલી જીત બદલ નેતાઓએ જનતાનો આભાર માન્યો હતો અને કાર્યકર્તાઓને અભિનંદન પાઠવ્યા હતા.
પ્રદેશ પ્રમુખ જગદીશ વિશ્વકર્માએ ગાંધીનગરમાં આમ આદમી પાર્ટીના તમામ ઉમેદવારોની ડિપોઝિટ જપ્ત થવા અંગે ટિપ્પણી કરતાં તેને રાજ્યની જનતાના મૂડ સાથે જોડ્યું હતું. તેમણે દાવો કર્યો હતો કે જનતાએ AAPને ફરી નકારી છે.
વિશ્વકર્માએ જણાવ્યું હતું કે આ ચૂંટણીમાં ભાજપને 57 ટકા, કોંગ્રેસને 37 ટકા અને AAPને 4 ટકા મત મળ્યા છે. જોકે, ગત ચૂંટણીની સરખામણીએ ભાજપને ઓછી બેઠકો મળવા અંગે તેમણે કહ્યું હતું કે પક્ષ પરિણામોની સમીક્ષા કરશે. દરેક ચૂંટણીમાં અલગ-અલગ રાજકીય સમીકરણો કામ કરતાં હોય છે, તેથી પરિણામોનું વિશ્લેષણ કરીને આગળની રણનીતિ નક્કી કરવામાં આવશે.
