માનસિક ત્રાસના આક્ષેપો બાદ 6 મહિના માટે સસ્પેન્શન, પોલીસ તપાસ શરૂ
સુરત: નવી સિવિલ હોસ્પિટલના બોયઝ પીજી હોસ્ટેલમાં 30 વર્ષીય રેસિડેન્ટ તબીબ ડૉ. હર્ષ પંડ્યાએ આપઘાત કરતાં ચકચાર મચી ગઈ હતી. ખટોદરા પોલીસે તપાસ હાથ ધરતાં કેસમાં સિનિયર તબીબો દ્વારા રેગિંગ અને માનસિક ત્રાસ આપવામાં આવ્યો હોવાના આક્ષેપો સામે આવ્યા છે.
પ્રાથમિક તપાસમાં રેગિંગ અંગેના પુરાવા મળ્યા બાદ મેડિકલ કોલેજ અને હોસ્પિટલ તંત્ર દ્વારા તપાસ કમિટી રચવામાં આવી હતી. તપાસ બાદ ચાર સિનિયર રેસિડેન્ટ ડૉક્ટરો સામે કાર્યવાહી કરવામાં આવી છે.
આરોપી તરીકે ડૉ. નિરાલી વસાવે, ડૉ. અનુજ મહેશ્વરી, ડૉ. હિના ભૂત અને ડૉ. દીક્ષિતા સેસારિયનનાં નામ સામે આવ્યા છે. સંસ્થાએ ચારેયને 6 મહિના માટે સસ્પેન્ડ કર્યા છે.
સસ્પેન્શન દરમિયાન ચારેય તબીબોને હોસ્પિટલની કામગીરી, હોસ્ટેલ અને તમામ ટીચિંગ તથા એકેડેમિક પ્રવૃત્તિઓથી દૂર રાખવામાં આવ્યા છે.
બીજી તરફ, ખટોદરા પોલીસે સમગ્ર મામલે રેગિંગ વિરોધી કાયદા હેઠળ ગુનો નોંધી વધુ તપાસ હાથ ધરી છે. તપાસમાં રેગિંગની ચોક્કસ ઘટના, માનસિક ત્રાસની વિગતો અને અન્ય સંભવિત જવાબદારો અંગે વધુ માહિતી સામે આવવાની શક્યતા છે.
