ચૂંટણીનાં પરિણામોના 20 દિવસ બાદ ભાજપે જાહેર કર્યા પદાધિકારીઓનાં નામ; કોંગ્રેસે કર્મજીતસિંહ વાઘેલાને વિપક્ષના નેતા બનાવ્યા
ગાંધીનગર મહાનગરપાલિકામાં ભાજપે સત્તા મેળવ્યા બાદ હવે નવા પદાધિકારીઓની વરણી કરવામાં આવી છે. 29 વર્ષના રૂપસિંહ ઠાકોરને મેયર તરીકેની જવાબદારી સોંપવામાં આવી છે, જ્યારે અંજના મહેતાની ડેપ્યુટી મેયર તરીકે અને મહેન્દ્ર પટેલની સ્ટેન્ડિંગ કમિટીના ચેરમેન તરીકે પસંદગી કરવામાં આવી છે. સામાન્ય ચૂંટણીનાં પરિણામો જાહેર થયાના 20 દિવસ બાદ આજે પદાધિકારીઓનાં નામની સત્તાવાર જાહેરાત કરવામાં આવી હતી.
ગાંધીનગર મહાનગરપાલિકાની સામાન્ય સભામાં મેયર, ડેપ્યુટી મેયર અને સ્ટેન્ડિંગ કમિટીના સભ્યો સહિત વિવિધ હોદ્દાઓ માટે વરણીની પ્રક્રિયા હાથ ધરવામાં આવી હતી. આ દરમિયાન કોંગ્રેસે પણ પોતાના વિપક્ષના નેતાના નામની જાહેરાત કરી હતી. આમ, મનપામાં નવી બોડીની રચના સાથે રાજકીય અને વહીવટી કામગીરીનો નવો તબક્કો શરૂ થયો છે.
મેન્ડેટ મોડું પહોંચતાં સામાન્ય સભાની કાર્યવાહી અટકી
સવારથી જ મહાનગરપાલિકા કચેરીમાં સામાન્ય સભાને લઈને તૈયારીઓ શરૂ કરી દેવામાં આવી હતી. જોકે, ભાજપના સભ્યો માટે પક્ષનું મેન્ડેટ સમયસર ન પહોંચતાં સભાની કાર્યવાહી શરૂ થઈ શકી નહોતી. આ મુદ્દે કોંગ્રેસના સભ્યોએ મનપા કમિશનર સમક્ષ રજૂઆત કરી હતી.
બીજી તરફ, ભાજપના શહેર પ્રભારી બપોરે આશરે દોઢ વાગ્યે મેન્ડેટ લઈને મનપા કચેરીએ પહોંચ્યા હતા. ત્યારબાદ પક્ષના નેતાઓ અને સભ્યો વચ્ચે સંકલન બેઠક યોજાઈ હતી. બેઠકમાં વિવિધ હોદ્દાઓ માટેનાં નામો અંગે ચર્ચા કર્યા બાદ અંતિમ નિર્ણય લેવામાં આવ્યો હતો.
પહેલી જ ચૂંટણીમાં જીત્યા, હવે મેયરની જવાબદારી
ભાજપની સંકલન અને પક્ષની બેઠકમાં 29 વર્ષના રૂપસિંહ ઠાકોરના નામ પર મેયર તરીકે મહોર મારવામાં આવી હતી. ખાસ વાત એ છે કે રૂપસિંહ ઠાકોરે પહેલી જ વખત મહાનગરપાલિકાની ચૂંટણી લડી હતી અને હવે તેમને શહેરના પ્રથમ નાગરિક તરીકેની જવાબદારી સોંપવામાં આવી છે. તેમનો પરિવાર પણ લાંબા સમયથી ભાજપ સાથે જોડાયેલો હોવાનું જણાવાયું છે.
મેયરપદ માટેની પસંદગીમાં આ વખતે સામાજિક સમીકરણોને પણ મહત્ત્વ આપવામાં આવ્યું હોવાનું માનવામાં આવે છે. ગાંધીનગર મનપામાં મેયરનું પદ OBC વર્ગ માટે અનામત હોવાથી ભાજપે આ અનામતને અનુરૂપ ઉમેદવારની પસંદગી કરી છે. આ હોદ્દા માટે મહેશ ચૌધરી અને કનૈયાલાલ દેસાઈનાં નામની પણ ચર્ચા ચાલી રહી હતી, પરંતુ અંતે રૂપસિંહ ઠાકોરની પસંદગી કરવામાં આવી હતી.
અંજના મહેતા અને મહેન્દ્ર પટેલને પણ મહત્ત્વની જવાબદારી
મેયરપદ ઉપરાંત અન્ય મહત્ત્વના હોદ્દાઓ માટે પણ ભાજપે નામ જાહેર કર્યાં છે. અંજના મહેતાને ડેપ્યુટી મેયર તરીકે પસંદ કરવામાં આવ્યાં છે, જ્યારે મહેન્દ્ર પટેલને સ્ટેન્ડિંગ કમિટીના ચેરમેનની જવાબદારી સોંપવામાં આવી છે. આ નવી ટીમ હવે ગાંધીનગર શહેરના વિકાસકાર્યો, નાગરિક સુવિધાઓ અને મહાનગરપાલિકાના વહીવટી નિર્ણયો સંભાળશે.
કોંગ્રેસે કર્મજીતસિંહ વાઘેલાને બનાવ્યા વિપક્ષના નેતા
બીજી તરફ, કોંગ્રેસે વોર્ડ નંબર 6માંથી ચૂંટાયેલા કર્મજીતસિંહ વાઘેલાને વિપક્ષના નેતા તરીકે જાહેર કર્યા છે. મનપામાં કોંગ્રેસ તરફથી તેઓ વિપક્ષની ભૂમિકા ભજવશે અને નાગરિક પ્રશ્નો તથા શહેરી વિકાસના મુદ્દાઓ પર સત્તાપક્ષ સામે રજૂઆત કરશે.
ગાંધીનગર મહાનગરપાલિકાની કુલ 44 બેઠકોમાંથી ભાજપે 38 બેઠકો પર જીત મેળવી હતી. કોંગ્રેસને 5 બેઠકો મળી હતી, જ્યારે એક બેઠક અપક્ષ ઉમેદવારના ફાળે ગઈ હતી. આ બહુમતીના આધારે ભાજપે મનપામાં સત્તા જાળવી રાખી છે.
આમ, 29 વર્ષના રૂપસિંહ ઠાકોરને મેયરપદની જવાબદારી મળતાં ગાંધીનગરના રાજકારણમાં યુવા નેતૃત્વને તક મળી છે. હવે નવી ટીમ સામે શહેરના વિકાસ, નાગરિક સુવિધાઓ અને વિવિધ પ્રોજેક્ટ્સને સમયસર પૂર્ણ કરાવવાનો પડકાર રહેશે.
