પંચનામા દરમિયાન પોલીસકર્મી સાથે ઝપાઝપી કરી રિવોલ્વર છીનવવાનો પ્રયાસ; એક પોલીસકર્મી પણ ઘાયલ
અમદાવાદ: ચર્ચિત જોધપુર દુષ્કર્મ કેસના આરોપી ધર્મસિંહે પંચનામાની કાર્યવાહી દરમિયાન પોલીસ કાફલા પર હુમલો કરી ફરાર થવાનો પ્રયાસ કરતાં પોલીસે ફાયરિંગ કર્યું હતું. પોલીસના જણાવ્યા મુજબ આરોપીએ પોલીસકર્મી સાથે ઝપાઝપી કરી તેની સરકારી રિવોલ્વર છીનવી ભાગવાનો પ્રયાસ કર્યો હતો.
પરિસ્થિતિ કાબૂ બહાર જતી જોઈ પોલીસે સ્વબચાવમાં ફાયરિંગ કરતાં એક ગોળી આરોપીના પગમાં વાગી હતી. આરોપી ઘટનાસ્થળે જ ઢળી પડ્યો હતો. ઝપાઝપી દરમિયાન એક પોલીસકર્મી પણ ઈજાગ્રસ્ત થયો હતો.
બંને ઈજાગ્રસ્તોને તાત્કાલિક સારવાર માટે અમદાવાદ સિવિલ હોસ્પિટલ ખસેડવામાં આવ્યા હતા. ઘટનાને પગલે હોસ્પિટલ પરિસરમાં ચુસ્ત પોલીસ બંદોબસ્ત ગોઠવાયો હતો. JCP અને DCP સહિતના ઉચ્ચ અધિકારીઓ પણ ઘટનાસ્થળે પહોંચ્યા હતા.
પોલીસે સમગ્ર બનાવની તપાસ શરૂ કરી છે. આરોપીએ રિવોલ્વર છીનવી ફરાર થવાનો પ્રયાસ કયા સંજોગોમાં કર્યો અને ઘટનાક્રમમાં અન્ય કોઈ બાબત સંકળાયેલી છે કે કેમ તે અંગે વધુ તપાસ હાથ ધરવામાં આવી રહી છે.
