એલસીબીની કાર્યવાહી: 23 વર્ષીય શખ્સ ઝડપાયો, રૂ.2 લાખનો મુદ્દામાલ જપ્ત
ખંભાળિયા: ખંભાળિયા-પોરબંદર હાઈવે પર એલસીબીની ટીમે કાર્યવાહી કરીને કારમાં દેશી દારૂ લઈ જતાં 23 વર્ષીય રામ ભારમલ ધારાણીને ઝડપી પાડ્યો છે.
પોલીસે કારમાંથી 200 લીટર દેશી દારૂ કબજે કર્યો હતો. દારૂ ઉપરાંત ટોયોટા કોરોલા કાર અને મોબાઈલ સહિત કુલ રૂ.2 લાખનો મુદ્દામાલ જપ્ત કરવામાં આવ્યો છે.
પૂછપરછમાં આ દારૂનો જથ્થો ભાણવડના રાણપર ગામના રાણા બાલા કોડીયાતર પાસેથી મેળવ્યો હોવાનું સામે આવ્યું છે. દારૂ મંગાવનારા અન્ય પાંચ શખ્સોની શોધખોળ શરૂ કરવામાં આવી છે.
ભાણવડમાં દારૂની ભઠ્ઠી પર દરોડો
બીજી તરફ, એલસીબીએ ભાણવડ નજીક બરડા ડુંગર વિસ્તારમાં દેશી દારૂની ભઠ્ઠી પર દરોડો પાડ્યો હતો. અહીંથી દારૂ, આથો અને તાંબાની નળી સહિત રૂ.46 હજારનો મુદ્દામાલ કબજે કરવામાં આવ્યો હતો.
આ કાર્યવાહીમાં રાણા બાલા કોડીયાતરની અટકાયત કરી ભાણવડ પોલીસ મથકમાં પ્રોહિબિશન એક્ટ હેઠળ ગુનો નોંધવામાં આવ્યો છે.
