જામનગર: જોડિયા અને ઘોલ તાલુકાના ખેડૂતોને સિંચાઈ માટે પૂરતું પાણી મળી રહે તે હેતુથી ઉડ-૨ સિંચાઈ યોજનાને પાઈપલાઈન મારફતે ઉડ-૧ યોજના સાથે જોડવાની માંગ ઉઠી છે. ઘોલ માર્કેટ યાર્ડના ચેરમેન રસિકભાઈ ભંડેરીએ રાજ્યના જળસંપત્તિ મંત્રી ઈશ્વરભાઈ પટેલ તેમજ સિંચાઈ વિભાગના અધિકારીઓ સમક્ષ આ અંગે રજૂઆત કરી છે.
જોડિયા-ઘોલ તાલુકાની વચ્ચે મજોઠ ગામ નજીક ઉડ-૨ ડેમ આવેલો છે, જ્યારે ઉડ-૧ સિંચાઈ યોજના આશરે 20 કિ.મી. દૂર છે. છેલ્લા બે વર્ષથી વરસાદ ઓછો પડતાં ઉડ-૧ના ઉપરવાસ અને નીચાણવાસના અનેક ગામોના ખેડૂતોને પિયત માટે પૂરતું પાણી મળતું નથી. સૌની યોજના મારફતે પણ અપેક્ષિત લાભ ન મળતા ખેડૂતોની મુશ્કેલીમાં વધારો થયો છે.
આ સંજોગોમાં ઉડ-૨ ડેમનું પાણી પાઈપલાઈન મારફતે ઉડ-૧ સિંચાઈ યોજના સુધી પહોંચાડવામાં આવે તો બંને તાલુકાના અનેક ગામોના ખેડૂતોને સિંચાઈ માટે મોટો લાભ મળી શકે તેવી રજૂઆત કરવામાં આવી છે.
મસાણિયા ચેકડેમ ખેડૂતો માટે જીવાદોરી
જોડિયા તાલુકામાં ઉડ નદી પર આવેલો મસાણિયા ચેકડેમ પણ આસપાસના ખેડૂતો માટે મહત્વપૂર્ણ જળસ્રોત છે. જોડિયા, બાદનપર અને કુનડ સહિતના ગામોના ખેડૂતો માટે આ ચેકડેમ જીવાદોરી સમાન હોવાનું સ્થાનિકો જણાવી રહ્યા છે.
હવે ઉડ-૨ને પાઈપલાઈનથી ઉડ-૧ સાથે જોડવાની માંગ અંગે સરકાર અને સિંચાઈ વિભાગ શું નિર્ણય લે છે તેના પર જોડિયા અને ઘોલ તાલુકાના ખેડૂતોની નજર છે.
