મોરબીના શનાળા રોડ પર ગુ.હા. બોર્ડના ગરબી ચોક નજીક પોલીસે બાતમીના આધારે દરોડો પાડી બે અલગ-અલગ બ્રાન્ડની કુલ 75 બોટલ દારૂ, કિંમત રૂ.17,600નો જથ્થો ઝડપી પાડ્યો હતો. પોલીસે વાસુભાઈ ભરતભાઈ લખતરીયા સામે પ્રોહિબિશન એક્ટ હેઠળ ગુનો નોંધી દારૂનો જથ્થો ક્યાંથી આવ્યો તે અંગે તપાસ શરૂ કરી છે.
સાપ કરડતાં યુવતી સારવાર હેઠળ
ટંકારાના વિરપર ગામે જયઅંબે પેકેજિંગ ખાતે કામ કરતી **શીતલબેન ઠાકોર (25)**ને સાપ કરડતાં સિવિલ હોસ્પિટલમાં સારવાર માટે ખસેડવામાં આવી હતી. બીજી તરફ મોરબીના સામાકાંઠે ભડીયાદ ખાતે રહેતી **જશુબેન જયસુખભાઈ સિતાપરા (36)**ને અજાણ્યા જીવજંતુએ કરડતાં સારવાર માટે હોસ્પિટલમાં ખસેડવામાં આવ્યા હતા.
પાણીની કુંડીમાં પડતાં 8 માસના બાળકનો બચાવ
ટંકારાના સજનપર ગામે જયેશભાઈની વાડીમાં મજૂરીકામ કરતા પરિવારનો 8 માસનો બાળક પ્રતિક રાકેશભાઈ પરમાર રમતી વખતે પાણીની કુંડીમાં પડી ગયો હતો. બનાવ બાદ 108 મારફતે તેને મોરબી સિવિલ હોસ્પિટલમાં સારવાર માટે ખસેડવામાં આવ્યો હતો.
અજાણ્યા ટ્રકની અડફેટે યુવાન ઘાયલ
વાંકાનેર હાઈવે પર જાંબુડિયા ગામ નજીક 20 વર્ષીય જગાભાઈ વિંજુવાડિયા પગપાળા પસાર થઈ રહ્યો હતો ત્યારે અજાણ્યા ટ્રકચાલકે તેને અડફેટે લીધો હતો. અકસ્માતમાં ઈજાગ્રસ્ત યુવાનને સારવાર માટે હોસ્પિટલમાં ખસેડાયો હતો.
પેટલાદથી ગુમ યુવતી મોરબીમાંથી મળી
પેટલાદ પોલીસ સ્ટેશન વિસ્તારમાંથી 13 ઓગસ્ટે ગુમ થયેલી ઉમીયાબેન તળપદા (22) અંગે પોલીસ તપાસ ચાલી રહી હતી. બાતમીના આધારે પેટલાદ પોલીસે મોરબીના સામાકાંઠે લક્ષ્મી સોસાયટીમાં તપાસ કરતાં યુવતી વિજય ઠાકોર (18) સાથે મળી આવી હતી. બંનેને પોલીસે હસ્તગત કરી વધુ તપાસ માટે પેટલાદ લઈ જવામાં આવ્યા હતા.
બાઇક સામે કૂતરું આવતાં અકસ્માત
મોરબીના ઘુંટુ રોડ પર ગોપાલ કાંટા નજીક અચાનક કૂતરું રસ્તા પર આવી જતાં બાઇક સ્લીપ થઈ હતી. અકસ્માતમાં વીસીપરા વિસ્તારમાં રહેતા **સચિન મોરવાડિયા (19)**ને ઈજા થતાં સારવાર માટે રાજકોટ ખસેડવામાં આવ્યો હતો.
બે વર્ષના બાળકે કપડાં ધોવાનું લિક્વિડ પીધું
મોરબીની વીસીપરા મદીના સોસાયટીમાં રહેતા બે વર્ષના જોહન સાજીદ શેખે ભૂલથી કપડાં ધોવાનું લિક્વિડ પી લેતાં તેને સારવાર માટે સિવિલ હોસ્પિટલમાં ખસેડવામાં આવ્યો હતો.
જાંબુડિયામાં બાળકોના ઝઘડામાં બે પરિવારો સામસામે
મોરબીના જાંબુડિયા ગામે શેરીમાં રમતા બાળકો વચ્ચે થયેલા ઝઘડાએ ઉગ્ર સ્વરૂપ ધારણ કર્યું હતું. બાદમાં બે પરિવારો વચ્ચે મારામારી થતાં અજય હરજીભાઈ આકરીયા (21) અને સામે પક્ષનાં **હંસાબેન સનુરા (42)**ને ઈજા થઈ હતી. બંનેને સારવાર માટે સરકારી હોસ્પિટલમાં ખસેડવામાં આવ્યા હતા.
