સ્વચ્છ ભારત અભિયાન અંતર્ગત બીચ પર સફાઈ : પોલીસ, SOG, મરીન ટાસ્ક ફોર્સ અને સ્થાનિકો જોડાયા
દ્વારકા: સ્વચ્છ ભારત અભિયાન અંતર્ગત ઓખા મરીન પોલીસ સ્ટેશન દ્વારા દ્વારકા નજીક આવેલા શિવરાજપુર બ્લુ ફ્લેગ બીચ ખાતે સફાઈ અભિયાન હાથ ધરવામાં આવ્યું હતું. બીચની સ્વચ્છતા જાળવવા તેમજ મુલાકાતીઓમાં સ્વચ્છતા અંગે જાગૃતિ લાવવાના હેતુથી પોલીસ કર્મચારીઓએ શ્રમદાન કર્યું હતું.
આ અભિયાનમાં ઓખા મરીન પોલીસ સ્ટાફ ઉપરાંત SOGના જવાનો, મરીન ટાસ્ક ફોર્સના અધિકારીઓ અને કર્મચારીઓ પણ જોડાયા હતા. સાથે શિવરાજપુરની સ્થાનિક શાળાના વિદ્યાર્થીઓ, બીચ મેનેજમેન્ટ સ્ટાફ અને સ્થાનિક આગેવાનોએ પણ ઉત્સાહપૂર્વક ભાગ લીધો હતો.
બીચ પરથી કચરો એકત્ર કર્યો
પોલીસ કર્મચારીઓ અને અન્ય સહભાગીઓએ બીચ પર વિવિધ સ્થળોએ પડેલો કચરો એકત્ર કરીને વિસ્તારને સ્વચ્છ બનાવ્યો હતો. શ્રમદાન દ્વારા જાહેર સ્થળોની સ્વચ્છતા જાળવવા સાથે પર્યાવરણ સંરક્ષણનો સંદેશ આપવામાં આવ્યો હતો.
મુલાકાતીઓને પણ સ્વચ્છતા જાળવવા અપીલ
અભિયાન દરમિયાન બીચ પર આવતા પ્રવાસીઓ અને મુલાકાતીઓને પણ કચરો જ્યાં-ત્યાં ન નાખવા તથા જાહેર સ્થળોની સ્વચ્છતા જાળવવામાં સહયોગ આપવા અપીલ કરવામાં આવી હતી.
આ પ્રકારના અભિયાનથી સ્વચ્છતા સાથે પર્યાવરણ પ્રત્યેની જવાબદારી અને જાહેર સ્થળોને સ્વચ્છ રાખવાની સામૂહિક ભાવના મજબૂત કરવાનો પ્રયાસ કરવામાં આવ્યો છે.
