ગાંધીનગર: ગુજરાતમાં આગામી વર્ષે યોજાનારી વાઈબ્રન્ટ ગુજરાત સમિટ-2027ની તૈયારીઓનો પ્રારંભ થઈ ગયો છે. સમિટના આયોજનને સુવ્યવસ્થિત રીતે પાર પાડવા માટે વિવિધ કામગીરીને આવરી લેતી 13 અલગ-અલગ સમિતિઓની રચના કરવામાં આવી છે.
આ સમિતિઓને કાર્યક્રમના સ્થળની વ્યવસ્થા અને નિરીક્ષણથી લઈને વિદેશી મહેમાનોના સ્વાગત અને સુવિધાઓ સુધીની વિવિધ જવાબદારીઓ સોંપવામાં આવશે. વિદેશી મહેમાનો માટે હોટેલ વ્યવસ્થા, ભોજન, પરિવહન, એરપોર્ટ લાયઝનિંગ સહિતની કામગીરી માટે પણ અલગથી આયોજન કરવામાં આવ્યું છે.
આ ઉપરાંત મીડિયા મેનેજમેન્ટ, કાયદો અને વ્યવસ્થા, સુરક્ષા સહિતની મહત્વપૂર્ણ જવાબદારીઓ પણ સમિતિઓને સોંપવામાં આવશે. સમિટ દરમિયાન દેશ-વિદેશના મહાનુભાવો અને ઉદ્યોગજગતના પ્રતિનિધિઓની હાજરીને ધ્યાનમાં રાખીને તંત્ર દ્વારા અત્યારથી જ તૈયારીઓ શરૂ કરી દેવામાં આવી છે.
આ 13 સમિતિઓના સંકલનથી વાઈબ્રન્ટ સમિટ-2027ના આયોજનને વધુ સુવ્યવસ્થિત અને અસરકારક બનાવવાનો સરકારનો પ્રયાસ છે. કાર્યક્રમની સફળતા માટે વિવિધ વિભાગો વચ્ચે સંકલન જળવાઈ રહે તે દિશામાં પણ કામગીરી હાથ ધરવામાં આવી રહી છે.
