રાજ્ય સરકાર દ્વારા અન્ન સુરક્ષા યોજના હેઠળ છેલ્લા પાંચ વર્ષમાં 25 લાખ જરૂરિયાતમંદ કુટુંબોના 1.14 કરોડથી વધુ લાભાર્થીઓને વિનામૂલ્યે અનાજ આપવામાં આવ્યું છે. આ સમયગાળા દરમિયાન કુલ 136 લાખ મેટ્રિક ટન ઘઉં અને ચોખા તથા 3 લાખ મેટ્રિક ટન બરછટ અનાજનું વિતરણ કરવામાં આવ્યું છે.
મુખ્યમંત્રી ભૂપેન્દ્ર પટેલના માર્ગદર્શન હેઠળ રાજ્ય સરકાર દ્વારા વિવિધ તહેવારો તેમજ માસિક ધોરણે લાભાર્થી પરિવારોને રાહત દરે અને વિનામૂલ્યે ઘઉં, ચોખા, ખાંડ, તેલ, ચણા અને બરછટ અનાજ સહિતની ચીજવસ્તુઓ આપવામાં આવી રહી છે. અન્ન અને નાગરિક પુરવઠા મંત્રી રમણભાઈ સોલંકીએ આ અંગે માહિતી આપી હતી.
અન્ન સુરક્ષા યોજના હેઠળ વર્ષ 2022-23માં 3.06 લાખ કુટુંબોના 14.48 લાખ લોકોને અનાજનો લાભ મળ્યો હતો. ત્યારબાદ વર્ષ 2023-24માં 5.63 લાખ કુટુંબોના 25.43 લાખ લાભાર્થીઓ સુધી આ યોજનાનો લાભ પહોંચ્યો હતો.
વર્ષ 2024-25માં લાભાર્થીઓની સંખ્યા વધીને 7.49 લાખ કુટુંબોના 34.53 લાખ લોકો સુધી પહોંચી હતી. જ્યારે ચાલુ વર્ષ 2025-26માં 9.20 લાખ કુટુંબોના 39.65 લાખથી વધુ નાગરિકોને અનાજનો સીધો લાભ આપવામાં આવ્યો છે.
સરકારના જણાવ્યા મુજબ, જરૂરિયાતમંદ પરિવારોને ખાદ્ય સુરક્ષા પૂરી પાડવા માટે અન્ન સુરક્ષા યોજના હેઠળ નિયમિત ધોરણે અનાજનું વિતરણ કરવામાં આવી રહ્યું છે.
