પ્રાઇમરી માર્કેટમાં IPOનું જોરદાર વાવાઝોડું : મેગા ઈશ્યૂ માટે રોકાણકારોમાં ભારે ઉત્સાહ
પ્રાઇમરી માર્કેટમાં હાલ IPOનું જોરદાર વાવાઝોડું ચાલી રહ્યું છે. એક પછી એક નવી કંપનીઓ બજારમાં IPO લાવી રહી છે અને રોકાણકારો તરફથી પણ તેને મોટો પ્રતિસાદ મળી રહ્યો છે. ખાસ કરીને મેઇન બોર્ડના IPOની સંખ્યા વધી રહી છે અને અપવાદરૂપ એક-બે ઈશ્યૂને બાદ કરતાં મોટાભાગના IPO અનેક ગણાં ઓવર સબસ્ક્રાઇબ થઈ રહ્યા છે. આશ્ચર્યની વાત એ છે કે ખોટ કરતી કેટલીક કંપનીઓના IPOને પણ રોકાણકારો તરફથી ભારે માંગ મળી રહી છે.
આ સ્થિતિ પાછળનું એક કારણ એ છે કે છેલ્લા કેટલાક સમયથી સેકન્ડરી માર્કેટમાં અપેક્ષા મુજબની તેજી જોવા મળી નથી. જેના કારણે કેટલાક રોકાણકારોનો સેકન્ડરી માર્કેટ પરથી વિશ્વાસ થોડો ઘટ્યો છે અને તેઓ ટૂંકા ગાળાના વળતર માટે IPO તરફ વળી રહ્યા છે.
બીજી તરફ સેકન્ડરી માર્કેટમાં વિદેશી સંસ્થાકીય રોકાણકારો એટલે કે FIIની વેચવાલીમાં ઘટાડો જોવા મળી રહ્યો છે. જૂના રોકાણકારો પણ હાલ શેરોમાં મોટા પાયે વેચવાલી કરવાને બદલે બજારમાં સુધારાની રાહ જોઈ રહ્યા છે. સ્થાનિક મ્યુચ્યુઅલ ફંડો અને નાણાકીય સંસ્થાઓ સતત ખરીદી કરી રહી હોવાથી બજારને સપોર્ટ મળી રહ્યો છે.
વર્ષના અંત સુધીમાં રૂ.2 લાખ કરોડથી વધુના IPOની શક્યતા
આગામી સમયમાં પ્રાઇમરી માર્કેટમાં અનેક મેગા IPO આવવાની શક્યતા છે. નિષ્ણાતોના અંદાજ પ્રમાણે વર્ષના અંત સુધીમાં 120થી વધુ કંપનીઓ રૂ.2 લાખ કરોડથી વધુની કુલ રકમના IPO લાવી શકે છે. હાલ પ્રાઇમરી માર્કેટનું વાતાવરણ સકારાત્મક હોવાથી અનેક કંપનીઓ આ તકનો લાભ લેવા માટે IPO લાવવાની તૈયારી કરી રહી છે.
રાજકોટ બની રહ્યું છે IPOનું હબ
રાજકોટમાં પણ IPOને લઈને રોકાણકારોમાં ભારે ઉત્સાહ જોવા મળી રહ્યો છે. અન્ય શહેરોની સરખામણીએ રાજકોટમાં IPO માટે મોટી સંખ્યામાં અરજીઓ કરવામાં આવે છે. ખાસ વાત એ છે કે રાજકોટના 50 ટકાથી વધુ રોકાણકારો લિસ્ટિંગના દિવસે જ શેર વેચીને મૂડી છૂટી કરી દેતા હોવાનો દાવો કરવામાં આવી રહ્યો છે.
આ રોકાણકારો IPOમાં લાંબા ગાળાના રોકાણ કરતાં લિસ્ટિંગ ગેઇન મેળવવા પર વધુ ધ્યાન આપે છે. લિસ્ટિંગ બાદ શેર વેચીને મળેલી મૂડીનો ઉપયોગ તેઓ આગામી IPOમાં રોકાણ કરવા માટે કરતા હોય છે. એટલે રાજકોટમાં IPO માટેનો રોકાણકાર વર્ગ મુખ્યત્વે ટૂંકા ગાળાની વ્યૂહરચના અપનાવતો જોવા મળી રહ્યો છે.
NSEના મેગા IPOની રાહ
નેશનલ સ્ટોક એક્સચેન્જ (NSE)નો IPO પણ આવનારા સમયમાં બજારમાં આવી શકે તેવી શક્યતા છે. NSEનો ઈશ્યૂ આવે તો તે મેગા IPO બની શકે છે અને પ્રાઇમરી માર્કેટ માટે ઐતિહાસિક કદનો ઈશ્યૂ સાબિત થવાની સંભાવના છે.
રોકાણકારો પણ NSEના IPOની આતુરતાપૂર્વક રાહ જોઈ રહ્યા છે. વિશ્વસનીય સંસ્થા તરીકે NSEના IPOને રોકાણકારો તરફથી જોરદાર પ્રતિસાદ મળવાની અપેક્ષા વ્યક્ત કરવામાં આવી રહી છે. જો NSEનો IPO વર્ષના અંત સુધીમાં આવે અને તેને મોટો પ્રતિસાદ મળે તો પ્રાઇમરી માર્કેટની ગતિવિધિઓમાં વધુ તેજી આવી શકે છે.
રિલાયન્સ ગ્રુપના IPO પર પણ નજર
રિલાયન્સ ગ્રુપ તરફથી પણ આગામી સમયમાં એક મેગા IPO આવવાની શક્યતા અંગે બજારમાં ચર્ચા છે. NSE અને રિલાયન્સ ગ્રુપના IPO જો વર્ષના અંત સુધીમાં બજારમાં આવે તો પ્રાઇમરી માર્કેટમાં રોકાણકારોની પ્રવૃત્તિમાં નોંધપાત્ર વધારો થઈ શકે છે.
શેરબજારના નિષ્ણાત પરેશભાઈ વાઘાણીના જણાવ્યા અનુસાર, આવનારા દિવસો પ્રાઇમરી માર્કેટ માટે મહત્વપૂર્ણ રહેશે. FIIની સેકન્ડરી માર્કેટમાં વેચવાલી ઘટી રહી હોવાથી દિવાળી સુધીમાં સેકન્ડરી માર્કેટમાં પણ સુધારો જોવા મળી શકે છે.
હાલ IPOની વણઝાર વચ્ચે રોકાણકારો પાસે પૂરતું ફંડ ઉપલબ્ધ હોવાનું માનવામાં આવે છે. તેથી આગામી સમયમાં મોટા કદના IPO આવે તો પણ તેને સારો પ્રતિસાદ મળવાની શક્યતા છે અને પ્રાઇમરી માર્કેટ માટે આ સમયગાળો સીમાચિહ્નરૂપ બની શકે છે.
