સામાન્ય જીપ્સી સફારીની પરમિટ ફી ₹800થી વધીને ₹1,800 સુધી થઈ શકે; નવા પ્રીમિયમ પેકેજની પણ દરખાસ્ત
સાસણ ગીર: એશિયાઈ સિંહોના એકમાત્ર કુદરતી નિવાસસ્થાન એવા ગીર નેશનલ પાર્કની મુલાકાત આગામી પ્રવાસન સીઝનથી મોંઘી બની શકે છે. ગુજરાત વન વિભાગે છેલ્લા 11 વર્ષથી સફારી ફીમાં કોઈ ફેરફાર કર્યો નથી, પરંતુ પ્રવાસીઓની સતત વધતી સંખ્યા અને સંચાલન ખર્ચને ધ્યાનમાં રાખીને હવે ફીમાં મોટો ફેરફાર કરવાની તૈયારી શરૂ કરી છે.
નવી ફી નક્કી કરતા પહેલાં રાજસ્થાન, મધ્યપ્રદેશ અને મહારાષ્ટ્ર સહિતના અન્ય રાજ્યોના નેશનલ પાર્કની ફી વ્યવસ્થાનો પણ અભ્યાસ કરવામાં આવી રહ્યો છે.
જીપ્સી સફારીની ફી ₹1,800 સુધી થઈ શકે
નવી દરખાસ્ત મુજબ સામાન્ય 6-સીટર જીપ્સી સફારીની ઓનલાઈન પરમિટ ફી ₹800થી વધારીને આશરે ₹1,800 કરવામાં આવી શકે છે. એટલે કે હાલની સરખામણીએ ફી બમણાથી પણ વધુ થઈ શકે છે.
વિદેશી પ્રવાસીઓ માટે પરમિટ ફી $80થી વધારીને $125 કરવાની દરખાસ્ત છે. ભારતીય ચલણમાં આ રકમ આશરે ₹11,800 જેટલી થાય છે.
જોકે, આ માત્ર વન વિભાગની પરમિટ ફી હશે. પ્રવાસીઓએ આ ઉપરાંત ગાઈડ ફી ₹400 અને સફારી વાહનનો આશરે ₹6,200નો ખર્ચ અલગથી ચૂકવવો પડશે.
8-સીટર વાહનમાં શેરિંગની નવી વ્યવસ્થા
વન વિભાગ દ્વારા 8-સીટર વાહનોમાં શેરિંગ મોડેલ શરૂ કરવાનો પણ વિચાર કરવામાં આવી રહ્યો છે. આ વ્યવસ્થામાં બે કે ત્રણ અલગ-અલગ નાના ગ્રુપ એક જ વાહનમાં સફારી કરી શકશે.
આ પ્રકારની સફારી માટે પરમિટ ફી ₹2,000થી વધુ રાખવાની શક્યતા છે. આ વ્યવસ્થા પ્રવાસીઓના પ્રતિસાદના આધારે આગળ ચાલુ રાખવી કે નહીં તે નક્કી કરવામાં આવશે.
તત્કાલ પરમિટ માટે ₹20 હજારથી શરૂઆત
છેલ્લી ઘડીએ સફારીનું આયોજન કરતા પ્રવાસીઓ માટે તત્કાલ અને પ્રીમિયમ પરમિટની વ્યવસ્થા કરવાની પણ દરખાસ્ત છે. તેની કિંમત ₹20,000થી શરૂ થાય તેવી શક્યતા છે.
આ ઉપરાંત, વન અને વન્યજીવનને વધુ નજીકથી માણવા ઇચ્છતા પ્રવાસીઓ માટે પ્રથમ વખત 6 કલાકનું ખાસ મોર્નિંગ સફારી પેકેજ રજૂ કરવાની તૈયારી છે. તેમાં જંગલ સફારીની સાથે બર્ડવોચિંગનો પણ સમાવેશ કરવામાં આવશે. આ પેકેજની ફી ₹50,000થી વધુ રાખવાની દરખાસ્ત છે.
દેવળિયામાં પણ નવું પેકેજ
દેવળિયા સફારી પાર્કમાં પણ નવા પેકેજની યોજના છે. તેમાં AC બસ રાઈડ, ટ્રેકિંગ અને પક્ષી દર્શન જેવી સુવિધાઓનો સમાવેશ થઈ શકે છે. આ પેકેજનો અંદાજિત ખર્ચ પ્રતિ વ્યક્તિ ₹1,500 રાખવાની વિચારણા છે.
પર્સનલ કેમેરાનો ₹200 ચાર્જ દૂર કરવાની ભલામણ
સામાન્ય પ્રવાસીઓ માટે રાહતના સમાચાર પણ છે. વ્યક્તિગત કેમેરા માટે લેવામાં આવતો ₹200નો અલગ ચાર્જ નાબૂદ કરવાની ભલામણ કરવામાં આવી છે.
અધિકારીઓના જણાવ્યા મુજબ, હવે મોટાભાગના પ્રવાસીઓ પ્રોફેશનલ કેમેરાની જગ્યાએ સ્માર્ટફોનથી ફોટોગ્રાફી કરતા હોવાથી આ ચાર્જ દૂર કરવાની ભલામણ કરાઈ છે.
જોકે, વાઇલ્ડલાઇફ ડોક્યુમેન્ટરી, ફીચર ફિલ્મ અને ટીવી સિરિયલના શૂટિંગ માટેના ચાર્જમાં 40 ટકા સુધીનો વધારો થઈ શકે છે.
16 ઓક્ટોબરથી ગીર સફારી ફરી ખુલશે
દર વર્ષની જેમ ચોમાસાની ઋતુ દરમિયાન સિંહોના સંવર્ધન અને જંગલના રસ્તાઓની રિપેરિંગ કામગીરીને કારણે ગીર સફારી 15 જૂનથી બંધ છે.
ચોમાસાનો વિરામ પૂર્ણ થયા બાદ 16 ઓક્ટોબરથી ગીર સફારી પ્રવાસીઓ માટે ફરી શરૂ થવાની છે. નવી પ્રવાસન સીઝનમાં પ્રવાસીઓને સફારી માટે નવા દરો ઉપરાંત શેરિંગ વાહન, પ્રીમિયમ પરમિટ અને ખાસ સફારી પેકેજ જેવા નવા વિકલ્પો પણ મળી શકે છે.
