ઈકો ગાડીમાંથી રૂ.1 લાખનો દારૂ અને રૂ.3 લાખનું વાહન મળી કુલ રૂ.4 લાખનો મુદ્દામાલ જપ્ત
હળવદ: હળવદ તાલુકાના ઘનશ્યામપુર ગામ નજીક સરા રોડ પરથી પસાર થતી ઈકો ગાડીમાંથી પોલીસે 500 લીટર દેશી દારૂનો જથ્થો ઝડપી પાડ્યો છે. પોલીસે ગાડીમાં સવાર ત્રણ શખ્સોની ધરપકડ કરી કુલ રૂ.4 લાખનો મુદ્દામાલ કબજે કર્યો છે. દારૂનો જથ્થો ગાડીમાં ભરી આપનાર શખ્સને ઝડપી પાડવા પોલીસે તપાસ શરૂ કરી છે.
હળવદ તાલુકા પોલીસની ટીમ પેટ્રોલિંગમાં હતી ત્યારે ઘનશ્યામપુર ગામ નજીક સરા રોડ પરથી GJ-13-AM-4027 નંબરની ઈકો ગાડી પસાર થઈ રહી હતી. પોલીસને શંકા જતા ગાડી રોકી તપાસ કરવામાં આવી હતી. તપાસ દરમિયાન ગાડીમાંથી 500 લીટર દેશી દારૂનો જથ્થો મળી આવ્યો હતો.
પોલીસે દારૂની કિંમત આશરે રૂ.1 લાખ અને ઈકો ગાડીની કિંમત રૂ.3 લાખ ગણી કુલ રૂ.4 લાખનો મુદ્દામાલ કબજે કર્યો હતો.
ત્રણ આરોપીની ધરપકડ
આ મામલે પોલીસે ધાંગધ્રામાં કબ્રસ્તાન પાસે રહેતા ત્રણ શખ્સોની ધરપકડ કરી છે:
ફિરોજ ફતેહખાન મકરાણી (29)
આસિફ મનસુરભાઈ મીર (47)
અફઝલ અલારખાભાઈ મકરાણી (31)
પોલીસે ત્રણેય વિરુદ્ધ હળવદ તાલુકા પોલીસ સ્ટેશનમાં ગુનો નોંધી કાયદેસરની કાર્યવાહી હાથ ધરી છે.
ચોટીલાથી દારૂ ભરી આપ્યાનો ખુલાસો
પ્રાથમિક પૂછપરછ દરમિયાન આરોપીઓએ પોલીસને જણાવ્યું હોવાનું સામે આવ્યું છે કે ઈકો ગાડીમાં દેશી દારૂનો જથ્થો ચોટીલા તાલુકાના ખાટડી ગામના શિવરાજભાઈ ગભરૂભાઈ કાઠી દરબારે ભરી આપ્યો હતો.
આરોપીઓના જણાવ્યા મુજબ, ફિરોજની ઈકો ગાડીમાં આસિફ અને અફઝલ દારૂનો જથ્થો લઈને હળવદ થઈ ધાંગધ્રા તરફ જઈ રહ્યા હતા. દરમિયાન ઘનશ્યામપુર ગામ નજીક હળવદ પોલીસે ગાડી રોકી તપાસ કરતા દારૂનો જથ્થો ઝડપાઈ ગયો હતો.
હવે પોલીસે દારૂનો જથ્થો સપ્લાય કરનાર શિવરાજભાઈને ઝડપી પાડવા માટે વધુ તપાસ અને કાર્યવાહી શરૂ કરી છે.
