શીતળા સાતમના પાવન પર્વે માતાજીના દર્શન માટે વિશેષ વ્યવસ્થા, આસપાસના ગામડાંમાંથી મોટી સંખ્યામાં શ્રદ્ધાળુઓ ઉમટશે
ભાવનગર: શહેરના ઘોઘા રોડ પર આવેલું પૌરાણિક મોટા શીતળામાતાનું મંદિર વર્ષોથી શ્રદ્ધાળુઓની આસ્થાનું કેન્દ્ર રહ્યું છે. શીતળા સાતમના પાવન પર્વ નિમિત્તે તા. 3 સપ્ટેમ્બર, ગુરુવારના રોજ મંદિર ખાતે ભવ્ય ધાર્મિક કાર્યક્રમો સાથે પરંપરાગત ભાતીગળ લોકમેળાનું આયોજન કરવામાં આવ્યું છે.
શીતળા સાતમના દિવસે વહેલી સવારથી જ માતાજીના દર્શન માટે મોટી સંખ્યામાં ભક્તો ઉમટવાની શક્યતા હોવાથી મંદિર ખાતે દર્શન માટે વિશેષ વ્યવસ્થા કરવામાં આવી છે. ભક્તોને કોઈપણ પ્રકારની અગવડતા ન પડે તે માટે શીતળા સાતમ મહોત્સવ સેવા સમિતિ દ્વારા વિવિધ વ્યવસ્થાઓ કરવામાં આવી છે.
દર વર્ષે યોજાતા આ લોકમેળાનું આસપાસના ગ્રામ્ય વિસ્તારોના લોકોમાં વિશેષ મહત્વ છે. મેળામાં શહેર ઉપરાંત નજીકના અનેક ગામડાંમાંથી પણ મોટી સંખ્યામાં લોકો પરિવાર સાથે ઉપસ્થિત રહે છે. ભક્તોની ભીડને ધ્યાનમાં રાખીને વ્યવસ્થા જળવાઈ રહે તે માટે કંટ્રોલ રૂમની પણ વ્યવસ્થા કરવામાં આવી છે.
સેવા સમિતિ દ્વારા વિશેષ આયોજન
એક અખબારી યાદીમાં સેવા સમિતિના પ્રમુખ ઉદયભાઈ મકવાણા, ઉપપ્રમુખ ભરત મોણપરા સહિત કારોબારી સભ્યોએ આ વર્ષે શીતળા સાતમના મહોત્સવ અને લોકમેળાને લઈને કરવામાં આવેલી વ્યવસ્થાઓ અંગે માહિતી આપી હતી.
સમિતિ દ્વારા જણાવવામાં આવ્યું હતું કે શીતળા સાતમ મહોત્સવ સેવા સમિતિ તેમજ શીતળા માતાજીના મંદિર દ્વારા કોઈપણ પ્રકારનો ફંડ કે ફાળો લેવામાં આવતો નથી. સમગ્ર આયોજન સેવા ભાવનાથી કરવામાં આવે છે.
શીતળા સાતમના પવિત્ર પર્વે માતાજીના દર્શન માટે આવતા ભક્તોને કોઈ અસુવિધા ન પડે તે માટે મહોત્સવ સમિતિના કારોબારી સભ્યો તેમજ સેવાગણ દ્વારા સતત જહેમત ઉઠાવવામાં આવી રહી છે. ભક્તોની સુવિધા અને મેળાની વ્યવસ્થા સુચારુ રીતે જળવાઈ રહે તે માટે સ્વયંસેવકો દ્વારા સેવા આપવામાં આવશે.
