રૂ.133 કરોડના ખર્ચે રાજ્યના વિવિધ પ્રવાસન-ધાર્મિક સ્થળોનો થશે કાયાકલ્પ
ગાંધીનગર: ગુજરાત સરકાર દ્વારા રાજ્યના પ્રવાસન અને ધાર્મિક સ્થળોના વિકાસ માટે મહત્વપૂર્ણ નિર્ણય લેવામાં આવ્યો છે. રાજ્યના વિવિધ વિસ્તારોમાં પ્રવાસન સુવિધાઓ વધારવા અને ધાર્મિક સ્થળોના કાયાકલ્પ માટે અંદાજે રૂ.133 કરોડના ખર્ચે 10 જેટલા પ્રોજેક્ટને સૈદ્ધાંતિક મંજૂરી આપવામાં આવી છે.
રાજ્યના શહેરી વિકાસ અને શહેરી ગૃહ નિર્માણ વિભાગ દ્વારા મંજૂર કરાયેલા આ પ્રોજેક્ટમાં ગિર વિસ્તારના આઈકોનિક ડેવલપમેન્ટથી લઈને વિવિધ મંદિરો, કિલ્લા, નદી ઘાટ અને અન્ય પ્રવાસન સ્થળોના વિકાસનો સમાવેશ થાય છે.
ગિરથી રૂપાલ સુધી વિકાસકાર્યો
મંજૂર પ્રોજેક્ટમાં ગિર વિસ્તારના આઈકોનિક વિકાસ માટે રૂ.43.91 કરોડની ફાળવણી કરવામાં આવી છે. જ્યારે ગાંધીનગરના રૂપાલ ખાતે આવેલા પ્રસિદ્ધ વરદાયિની માતાજી મંદિરના સર્વગ્રાહી વિકાસ માટે રૂ.35 કરોડ મંજૂર કરાયા છે.
અમદાવાદ જિલ્લાના કેસરડી ખાતે જોધલપીર મંદિરના નવનિર્માણ માટે રૂ.21.75 કરોડ અને અંજારમાં ગોવર્ધન પર્વતના વિકાસ માટે રૂ.12.98 કરોડની જોગવાઈ કરવામાં આવી છે.
ઐતિહાસિક કિલ્લા અને મંદિરનો વિકાસ
સૌરાષ્ટ્રના ગોંડલ ખાતે આવેલા અનળગઢ કિલ્લા અને મહાકાળી માતાજી મંદિરના આસપાસના વિસ્તારના વિકાસ માટે રૂ.5.06 કરોડ ફાળવવામાં આવ્યા છે.
નવસારીના વાંસદા ખાતે ઉનાઈ માતાજી મંદિર સંકુલમાં ભવ્ય પ્રવેશદ્વાર, પ્રદક્ષિણા પથ, કલ્ચરલ હોલ, ભોજનાલય અને લાઈબ્રેરી સહિતની સુવિધાઓ વિકસાવવામાં આવશે. આ માટે રૂ.5.03 કરોડ મંજૂર કરવામાં આવ્યા છે.
મહિસાગર નદી પર બનશે આકર્ષક ઘાટ
વડોદરા જિલ્લાના સાવલી તાલુકાના ભાદરવા ગામમાં ચેહર માતાજીના મંદિર નજીક મહિસાગર નદી પર રૂ.3.31 કરોડના ખર્ચે ઘાટનું નિર્માણ કરવામાં આવશે. અહીં વોકવે, પેવર બ્લોક, સુરક્ષા રેલિંગ અને લેન્ડસ્કેપિંગ સહિતના કામો હાથ ધરાશે.
કયા સ્થળે કેટલા કરોડ?
સ્થળ વિકાસકાર્ય મંજૂર રકમ
ગિર આઈકોનિક પ્રવાસન વિકાસ રૂ.43.91 કરોડ
રૂપાલ, ગાંધીનગર વરદાયિની માતાજી મંદિર રૂ.35 કરોડ
કેસરડી, અમદાવાદ જોધલપીર મંદિર નવનિર્માણ રૂ.21.75 કરોડ
અંજાર ગોવર્ધન પર્વત વિકાસ રૂ.12.98 કરોડ
ગોંડલ અનળગઢ કિલ્લો અને મહાકાળી મંદિર રૂ.5.06 કરોડ
વાંસદા, નવસારી ઉનાઈ માતાજી મંદિર સંકુલ રૂ.5.03 કરોડ
ભાદરવા, સાવલી મહિસાગર નદી ઘાટ રૂ.3.31 કરોડ
તરભ, મહેસાણા વાળીનાથ મહાદેવ મંદિર સોલાર પ્રોજેક્ટ રૂ.2.68 કરોડ
ઉમરેચા, મહેસાણા મહાકાળી માતાજી મંદિર રૂ.50 લાખ
ધરમપુર, વલસાડ ગોરા રામજી મંદિર નવનિર્માણ રૂ.18.91 લાખ
આ પ્રોજેક્ટ પૂર્ણ થયા બાદ સંબંધિત સ્થળોએ પ્રવાસીઓ અને શ્રદ્ધાળુઓ માટે માળખાકીય સુવિધાઓમાં વધારો થશે. સાથે જ સ્થાનિક સ્તરે પ્રવાસન પ્રવૃત્તિઓને વેગ મળવાની અને રોજગારીની નવી તકો ઊભી થવાની પણ અપેક્ષા છે.
