જામનગર: શહેરમાં બેન્કના લોકરમાંથી અસલી સોનાના દાગીના ચોરી કરીને તેના સ્થાને નકલી દાગીના મૂકવાના કેસનો જામનગર સીટી એ ડિવિઝન પોલીસે ભેદ ઉકેલી બે આરોપીઓને ઝડપી લીધા છે. પોલીસે બંને આરોપીઓ પાસેથી કુલ રૂ.43.16 લાખનો મુદ્દામાલ કબજે કર્યો છે.
શહેરમાં ચોરી, ઘરફોડ ચોરી અને નોકરચોરીના વણઉકેલાયેલા ગુનાઓ શોધી કાઢવા માટે ઉચ્ચ પોલીસ અધિકારીઓના માર્ગદર્શન હેઠળ સીટી એ ડિવિઝન પોલીસની સર્વેલન્સ ટીમ તપાસમાં હતી.
શંકાસ્પદ સોનાના દાગીના વેચવા આવેલા શખ્સને ઝડપી લીધો
3 સપ્ટેમ્બર, 2026ના રોજ પોલીસને મળેલી બાતમીના આધારે માધવ પ્લાઝા વિસ્તારમાં એક શખ્સ શંકાસ્પદ સોનાના દાગીના વેચવા આવ્યો હોવાની માહિતી મળી હતી. પોલીસે કાર્યવાહી કરીને વિજયભાઈ આલાભાઈ વઘોરાને ઝડપી લીધો હતો.
પૂછપરછ દરમિયાન વિજયભાઈએ કબૂલાત કરી હતી કે રણજીતસાગર રોડ પર આવેલી ઇન્ડિયન (અલ્હાબાદ) બેન્કમાં પટાવાળા તરીકે નોકરી કરતા હસમુખભાઈ દિનેશભાઈ પારીયાએ બેન્કના લોકરમાંથી અસલી સોનાના દાગીના ચોરી કર્યા હતા. ત્યારબાદ અસલી દાગીનાના બદલે લોકરમાં નકલી દાગીના મૂકી દીધા હતા અને ચોરેલા સોનાના દાગીના વેચવા માટે વિજયભાઈને આપ્યા હતા.
રૂ.39.48 લાખના સોનાના દાગીના ચોરાયા
મામલાની જાણ બેન્ક મેનેજરને થતાં તપાસ કરવામાં આવી હતી. તપાસમાં હસમુખભાઈ પારીયાએ બેન્કના લોકરમાંથી કુલ રૂ.39,48,912ની કિંમતના સોનાના દાગીના ચોરી કર્યા હોવાનું સામે આવ્યું હતું. ત્યારબાદ બેન્ક મેનેજરની ફરિયાદના આધારે જામનગર સીટી એ ડિવિઝન પોલીસ સ્ટેશનમાં ગુનો નોંધવામાં આવ્યો હતો.
પોલીસે હસમુખભાઈ દિનેશભાઈ પારીયા (ઉંમર 35 વર્ષ) અને વિજયભાઈ આલાભાઈ વઘોરાની ધરપકડ કરી હતી.
347 ગ્રામથી વધુ સોનું અને રોકડ રિકવર
પ્રાથમિક તપાસ દરમિયાન બંને આરોપીઓ પાસેથી 17.040 ગ્રામ સોનાના દાગીના, બે મોબાઇલ ફોન સહિતનો મુદ્દામાલ કબજે કરવામાં આવ્યો હતો. ત્યારબાદ આરોપીઓના રિમાન્ડ મેળવી વધુ તપાસ કરતાં પોલીસે રૂ.2.60 લાખ રોકડા અને 330.05 ગ્રામ સોનાના દાગીના, જેની કિંમત આશરે રૂ.38.55 લાખ છે, તે પણ રિકવર કર્યા હતા.
આમ, સમગ્ર તપાસ દરમિયાન પોલીસે કુલ 347.09 ગ્રામ સોનાના દાગીના, જેની હાલની કિંમત આશરે રૂ.40.46 લાખ, રૂ.2.60 લાખ રોકડા અને રૂ.10 હજારની કિંમતના બે મોબાઇલ ફોન મળી કુલ રૂ.43.16 લાખનો મુદ્દામાલ કબજે કર્યો છે.
આ મુદ્દામાલ જામનગર સીટી એ ડિવિઝન પોલીસ સ્ટેશનમાં BNSની કલમ 306 અને 54 મુજબ કબજે કરવામાં આવ્યો છે. સમગ્ર મામલે પોલીસ દ્વારા વધુ તપાસ ચાલી રહી છે. આ ગુનામાં સંડોવાયેલા રમેશભાઈ ભીમજીભાઈ પારીયાની હજુ અટકાયત બાકી હોવાનું પોલીસે જણાવ્યું છે.
વિજયભાઈ સામે અગાઉ પણ અનેક ગુના નોંધાયેલા
પોલીસ તપાસમાં વિજયભાઈ આલાભાઈ વઘોરાનો ગુનાહિત ઇતિહાસ પણ સામે આવ્યો છે. તેની સામે જામનગર સીટી એ ડિવિઝન, જામનગર સીટી સી ડિવિઝન, ખંભાળિયા, રાજકોટ શહેરના ભક્તિનગર સહિતના પોલીસ મથકોમાં અગાઉ ગુનાઓ નોંધાયેલા હોવાનું જાણવા મળ્યું છે.
તેમાં પ્રોહિબિશન, જુગાર, ચોરી અને ઘરફોડ ચોરી જેવા ગુનાઓનો સમાવેશ થાય છે. આ ઉપરાંત સલાયા, વલસાડ-બીલાડ અને અમરેલી-પીપાવાવ પોલીસ સ્ટેશનમાં પણ તેની સામે પ્રોહિબિશનના ગુનાઓ નોંધાયેલા હોવાનું પોલીસ તપાસમાં બહાર આવ્યું છે.
