અમદાવાદ: 2013ના બળાત્કાર કેસમાં ગાંધીનગર કોર્ટ દ્વારા આજીવન કેદની સજા પામેલા આસારામની અસ્થાયી જામીન અરજી ગુજરાત હાઇકોર્ટે ફગાવી દીધી છે. જસ્ટિસ ગીતા ગોપી અને જસ્ટિસ એલ.એસ. પીરઝાદાની ખંડપીઠે મંગળવારે આ અરજી પર સુનાવણી કરી હતી.
આસારામના વકીલે રાજસ્થાન હાઇકોર્ટના તાજેતરના આદેશનો હવાલો આપી 20 દિવસના અસ્થાયી જામીનની માંગ કરી હતી. જોકે, રાજ્ય સરકારના વકીલે તેનો વિરોધ કરતાં જણાવ્યું કે માત્ર અન્ય કોર્ટના આદેશના આધારે જામીન આપી શકાય નહીં.
સુનાવણી દરમિયાન હાઇકોર્ટે સુપ્રીમ કોર્ટના અગાઉના આદેશ અને એઈમ્સ જોધપુરના તબીબી અહેવાલને ધ્યાનમાં લીધો હતો. કોર્ટે નોંધ્યું કે સુપ્રીમ કોર્ટે આસારામની તબિયત બગડે તો ફરી સુપ્રીમ કોર્ટનો સંપર્ક કરવાની છૂટ આપી છે. તેથી હાલ અસ્થાયી જામીન આપવાનું કોઈ યોગ્ય કારણ ન હોવાનું કહી હાઇકોર્ટે અરજી રદ કરી દીધી.
