18.467 કિલો ગાંજા સાથે એક આરોપી ઝડપાયા બાદ નાસી ગયેલો યુપીનો શખ્સ વતન ભાગે તે પહેલાં એલસીબીના હાથે ઝડપાયો
રાજકોટઃ રાજકોટ રેલવે સ્ટેશન પરથી લાખો રૂપિયાની કિંમતના ગાંજાના જથ્થા સાથે એક શખ્સ ઝડપાયા બાદ નાસી ગયેલા તેના સાગરીતને પણ રેલવે એલસીબીની ટીમે ઝડપી લીધો છે. પોલીસે બંને સામે કાર્યવાહી હાથ ધરી છે.
રેલવે એલસીબી પીઆઈ જે.આર. દેસાઈની રાહબરીમાં પીએસઆઈ જે.એમ. પરમાર અને ટીમે તા. 6 સપ્ટેમ્બરના રોજ રાજકોટ રેલવે સ્ટેશનના પ્લેટફોર્મ નંબર-1 પર વાંકાનેર તરફના છેડા પાસેથી શંકાસ્પદ રીતે વજનદાર ટ્રોલી બેગ લઈને ફરતા બે શખ્સોને રોકવાનો પ્રયાસ કર્યો હતો. દરમિયાન એક શખ્સ પોલીસને ચકમો આપી નાસી ગયો હતો, જ્યારે કર્મવીર પાટીલ નામનો શખ્સ ઝડપાઈ ગયો હતો.
પોલીસે કર્મવીર પાટીલ પાસે રહેલી ટ્રોલી બેગની તપાસ કરતાં તેમાંથી 18.467 કિલોગ્રામ ગાંજો, અંદાજે રૂ.9.41 લાખની કિંમતનો, મળી આવ્યો હતો. પોલીસે ગાંજો સહિતનો મુદ્દામાલ કબજે કરી આરોપીની ધરપકડ કરી હતી અને નાસી ગયેલા સાગરીતની શોધખોળ શરૂ કરી હતી.
દરમિયાન રેલવે એલસીબીના કોન્સ્ટેબલ હસમુખભાઈ રાઘવભાઈને બાતમી મળી હતી કે નાસી ગયેલો શખ્સ પોતાના વતન ઉત્તર પ્રદેશ ભાગી જવાની તૈયારીમાં છે અને ટ્રેન મારફતે યુપી જવાનો છે. બાતમીના આધારે પોલીસે **હર્ષસિંહ લલકસિંહ (ઉંમર 25, રહે. તેદુરા, બાંદા, ઉત્તર પ્રદેશ)**ને ઝડપી પાડ્યો હતો.
આ કામગીરીમાં પીએસઆઈ જે.એમ. પરમાર, એએસઆઈ હરપાલસિંહ, હેડ કોન્સ્ટેબલ પૃથ્વીરાજસિંહ તથા કોન્સ્ટેબલ હસમુખભાઈ, ભુપતભાઈ, જયેશભાઈ અને દિવ્યરાજસિંહ જોડાયા હતા. પોલીસે ઝડપાયેલા બંને શખ્સોની ગાંજાના જથ્થા સાથેની સંડોવણી અંગે વધુ તપાસ હાથ ધરી છે.
