ડિપ્રેશનની અસરથી દરિયામાં કરંટ વધ્યો, ઊંચાં મોજાં ઉછળતાં માછીમારોને દરિયો ન ખેડવા સૂચના
જાફરાબાદ બંદર ખાતે દરિયાઈ સ્થિતિ વધુ ઉગ્ર બનતાં મેરીટાઈમ બોર્ડ દ્વારા 3 નંબરનું ભયસૂચક ચેતવણી સિગ્નલ લગાવવામાં આવ્યું છે. અરબી સમુદ્રમાં સક્રિય થયેલા ડિપ્રેશનની અસર જાફરાબાદના દરિયાકાંઠે જોવા મળી રહી છે. દરિયામાં કરંટ વધતા ભારે હિલોળા સાથે ઊંચાં મોજાં ઉછળી રહ્યાં છે.
હવામાન વિભાગની આગાહીને પગલે જાફરાબાદ બંદર પર ચેતવણી સિગ્નલ ફરકાવવામાં આવ્યું છે. આજે સવારથી જ દરિયો સામાન્ય દિવસોની સરખામણીએ વધુ તોફાની જોવા મળી રહ્યો છે. દરિયાઈ પાણીમાં કરંટ વધ્યો હોવાથી ઊંચાં મોજાં ઉછળતાં બંદર તંત્ર દ્વારા સ્થિતિ પર સતત નજર રાખવામાં આવી રહી છે.
દરિયાની વિકટ સ્થિતિને ધ્યાનમાં રાખીને માછીમારોને દરિયામાં ન જવા તેમજ દરિયાકાંઠે બિનજરૂરી અવરજવર ટાળવા અપીલ કરવામાં આવી છે. જાફરાબાદ બંદર સહિત આસપાસના સમગ્ર દરિયાકાંઠા વિસ્તારમાં સાવચેતી અને સતર્કતા વધારી દેવામાં આવી છે.
