અમદાવાદ રેલવે પોલીસની SOG ટીમે વિરમગામ રેલવે સ્ટેશન પર બે અલગ-અલગ ટ્રેનોમાં તપાસ હાથ ધરી મોટી કાર્યવાહી કરી છે. શાલીમાર-ભુજ એક્સપ્રેસ અને શાલીમાર-પોરબંદર એક્સપ્રેસમાંથી કુલ 35.862 કિલો ગાંજો મળી આવ્યો હતો. પોલીસે બંને કેસમાં કુલ રૂ.17,93,100નો મુદ્દામાલ જપ્ત કરી NDPS એક્ટ હેઠળ કાર્યવાહી શરૂ કરી છે.
શાલીમાર-ભુજ એક્સપ્રેસમાંથી 31.970 કિલો ગાંજો
SOG ટીમે ટ્રેન નંબર 22830 શાલીમાર-ભુજ એક્સપ્રેસમાં તપાસ દરમિયાન 31.970 કિલો ગાંજો ઝડપી પાડ્યો હતો. જપ્ત કરાયેલા ગાંજાની અંદાજિત કિંમત રૂ.15,98,500 હોવાનું સામે આવ્યું છે.
શાલીમાર-પોરબંદર એક્સપ્રેસમાંથી 3.892 કિલો જથ્થો
બીજા કેસમાં ટ્રેન નંબર 12906 શાલીમાર-પોરબંદર એક્સપ્રેસમાં તપાસ કરવામાં આવી હતી. વિરમગામ સ્ટેશન પર તપાસ દરમિયાન 3.892 કિલો ગાંજો મળી આવ્યો હતો, જેની અંદાજિત કિંમત રૂ.1,94,600 હોવાનું પોલીસ દ્વારા જણાવાયું છે.
અજાણ્યા શખ્સો સામે NDPS એક્ટ હેઠળ કાર્યવાહી
બંને કાર્યવાહીમાં કુલ 35.862 કિલો ગાંજો અને રૂ.17.93 લાખનો મુદ્દામાલ કબજે કરવામાં આવ્યો છે. આ મામલે પોલીસે અજાણ્યા શખ્સો સામે NDPS એક્ટ હેઠળ ગુનો નોંધવાની કાર્યવાહી હાથ ધરી છે.
હાલ પોલીસ દ્વારા તપાસ કરવામાં આવી રહી છે કે ગાંજાનો આ જથ્થો કોણે ટ્રેન મારફતે મોકલ્યો હતો, ક્યાંથી લાવવામાં આવ્યો હતો અને કોને પહોંચાડવાનો હતો. રેલવે માર્ગે નશીલા પદાર્થોની હેરાફેરી અટકાવવા SOG દ્વારા ટ્રેનો અને રેલવે સ્ટેશનો પર તપાસ વધુ સઘન બનાવવામાં આવી રહી છે.
