સવારથી છૂટોછવાયો વરસાદ; નીચાણવાળા વિસ્તારોમાં પાણી ભરાતાં વાહનચાલકો પરેશાન, હાઈવે પર દૃશ્યતા ઘટી
ભાદરવા મહિનામાં વડોદરા શહેર અને જિલ્લામાં ફરી એકવાર વરસાદી માહોલ જામ્યો છે. આજે વહેલી સવારથી કાળા ડિબાંગ વાદળો વચ્ચે શહેર સહિત જિલ્લાના વિવિધ વિસ્તારોમાં છૂટોછવાયો વરસાદ વરસ્યો હતો. વરસાદને કારણે વાતાવરણમાં ઠંડક પ્રસરી હતી અને લોકોને ગરમીમાંથી રાહત મળી હતી.
સવારે વરસાદ વરસતા નોકરી-ધંધા માટે નીકળેલા લોકોને મુશ્કેલીનો સામનો કરવો પડ્યો હતો. શહેરના કેટલાક નીચાણવાળા માર્ગો પર વરસાદી પાણી ભરાતાં વાહનચાલકોને પાણીમાંથી પસાર થવાની ફરજ પડી હતી. બીજી તરફ ધોરીમાર્ગો પર વરસાદના કારણે દૃશ્યતા ઘટતાં વાહનચાલકોએ દિવસ દરમિયાન પણ વાહનની લાઇટ ચાલુ રાખીને મુસાફરી કરવી પડી હતી.
ખરાબ હવામાનની અસર હવાઈ સેવાને પણ થઈ હોવાનું સામે આવ્યું છે. કેટલીક ફ્લાઈટ્સને અન્ય સ્થળે વાળવામાં આવી હોવાની માહિતી વચ્ચે મુસાફરોને પણ હાલાકીનો સામનો કરવો પડ્યો હતો.
ગોપીપુરામાં સૌથી વધુ 44 મિમી વરસાદ
વડોદરા મ્યુનિસિપલ કોર્પોરેશન દ્વારા સવારે 11:40 વાગ્યે જાહેર કરાયેલા આંકડા મુજબ શહેરના વિવિધ વિસ્તારોમાં વરસાદ નોંધાયો છે. માંજલપુરમાં 17 મિમી, સમામાં 13.50 મિમી, ગોત્રીમાં 12.50 મિમી, દાંડિયા બજારમાં 10.50 મિમી અને આજવા રોડ વિસ્તારમાં 9 મિમી વરસાદ નોંધાયો હતો.
જિલ્લામાં ગોપીપુરા ખાતે સૌથી વધુ 44 મિમી વરસાદ નોંધાયો છે, જ્યારે આજવા રોડ વિસ્તારમાં 9 મિમી વરસાદ નોંધાયો છે.
રાજ્યમાં કેટલાક વિસ્તારોમાં ચોમાસું નબળું રહ્યું છે અને ખાસ કરીને સૌરાષ્ટ્રમાં વરસાદની ઘટ યથાવત છે. ત્યારે ભાદરવામાં વડોદરા સહિતના વિસ્તારોમાં ફરી વરસાદી માહોલ જામતાં લોકોને ગરમીમાંથી રાહત મળી છે.
