રાજકોટ : નવરાત્રિ 2026ને લઈને ગુજરાત સહિત મુંબઈમાં ગરબાના મોટા આયોજનોની તૈયારીઓ શરૂ થઈ ગઈ છે. અમદાવાદ, સુરત, વડોદરા સહિતના શહેરોમાં જાણીતા ગાયકો અને કલાકારો અલગ-અલગ ગરબા મહોત્સવોમાં પરફોર્મ કરશે. આ વખતે પરંપરાગત લોકગીતો સાથે નવા કમ્પોઝિશન અને ટ્રેન્ડિંગ ગીતોનો પણ સંગમ જોવા મળશે.
અમદાવાદમાં આદિત્ય ગઢવી, જીગરદાન ગઢવી, કિંજલ દવે, કીર્તિદાન ગઢવી, જિગ્નેશ કવિરાજ, હાર્દિક દવે, ઐશ્વર્યા મજમુદાર, ઈશાની દવે, દિવ્યા ચૌધરી સહિતના કલાકારો વિવિધ આયોજનોમાં ગરબાની રમઝટ બોલાવશે. હાર્દિક દવેના જણાવ્યા મુજબ, છેલ્લા કેટલાક વર્ષોથી તેમની ટીમ નવરાત્રિની રજૂઆતમાં નવા પ્રયોગો કરી રહી છે અને ગરબાના મૂળ સ્વરૂપ તથા પરંપરાને જાળવી રાખવા પર ભાર મૂકાઈ રહ્યો છે.
હાર્દિક દવેના જણાવ્યા પ્રમાણે તેમની ટીમ દર વર્ષે 60થી 70 ટકા જેટલા નવા લોકગીતો અને કમ્પોઝિશન તૈયાર કરે છે. આ વર્ષે ‘સોળ સજીને મા…’થી શરૂ થતું નવું કમ્પોઝિશન પણ રજૂ કરવામાં આવશે. હાર્દિક દવે અને પ્રફુલ દવેની ‘નવશક્તિ નવરાત્રિ’ અમદાવાદના સોલા ભાગવત ખાતે યોજાશે.
અમદાવાદમાં જાણીતા કલાકારોના મોટા આયોજન
અમદાવાદમાં કીર્તિદાન ગઢવી ગોપાલ ફાર્મ ખાતે ‘પરંપરા ગરબા’, ઐશ્વર્યા મજમુદાર મકરબાની સ્વર્ણિમ નગરી ખાતે ‘સ્વર્ણિમ નવરાત્રિ’, જીગરદાન ગઢવી સાયન્સ સિટી ખાતે ‘સાચી નવરાત્રિ’ અને હરિ ઓમ ગઢવી એસજી હાઈવે ખાતે ‘સેક્રેડ રાસ’માં પરફોર્મ કરશે.
જિગ્નેશ કવિરાજ નિકોલના સેવન સ્ટાર પાર્ટી પ્લોટ ખાતે ‘દાંડિયા ધમાલ’માં, જ્યારે આદિત્ય ગઢવી શેલા રોડની સાવન્ના પાર્ટી લોન ખાતે ‘રંગ મોરલા’માં ખેલૈયાઓને ઝુમાવશે. ઈશાની દવે શંકુઝ શેરી સર્કલ, અરવિંદ વેગડા કાંકરિયાની એકા ક્લબ અને દિવ્યા ચૌધરી ઓગણજના 9 બ્રધર પાર્ટી પ્લોટ ખાતે પરફોર્મ કરશે.
સુરત-વડોદરામાં પણ ગરબાની ધૂમ
વડોદરામાં અતુલ પુરોહિત યુનાઇટેડ વે ઓફ બરોડા ગરબા મહોત્સવમાં એમ.એમ. પટેલ ફાર્મ ખાતે પરફોર્મ કરશે. સુરતમાં પૂર્વા મંત્રી ‘યશ્વી નવરાત્રિ 3.0’માં સી.બી. પટેલ ક્રિકેટ સ્ટેડિયમ ખાતે જોવા મળશે. કાજલ મહેરિયા ગાંધીનગરના સેક્ટર-6/ઉ ગ્રાઉન્ડ ખાતે ‘થનગનાટ નવરાત્રિ મહોત્સવ’માં પરફોર્મ કરશે. અઘોરી મ્યુઝિકનું ‘માંડવો-ધ સર્કલ ઓફ શક્તિ’ જાસપુરના વિશ્વ ઉમિયા ફાઉન્ડેશન ખાતે યોજાશે.
મુંબઈમાં પણ જાણીતા કલાકારોનો જમાવડો
મુંબઈમાં કિંજલ દવે કોરા કેન્દ્ર ગ્રાઉન્ડ-1, ફાલ્ગુની પાઠક બાંદ્રા-કુર્લા કોમ્પલેક્સ અને ગીતા રબારી કોરા કેન્દ્ર ગ્રાઉન્ડ-4 ખાતે પરફોર્મ કરશે. પાર્થિવ ગોહિલ ગોરેગાંવના NESCO હોલ-6માં ‘રંગીલો રે 2026’ તથા ભૂમિ ત્રિવેદી બોરીવલીના બાળાસાહેબ ઠાકરે મનોરંજન ગ્રાઉન્ડ ખાતે ‘રંગરાસ નવરાત્રિ 2026’માં ગરબાની રમઝટ બોલાવશે.
સુરતમાં ‘સૂર તાલ ને સંગ રાસરંગ નવરાત્રિ 2.0’માં પ્રાચીન-અર્વાચીન ગરબા, નવા દેશી લોકગીતો અને ટ્રેન્ડિંગ ગીતો રજૂ કરવામાં આવશે. આ ઉપરાંત ફાલ્ગુની પાઠક આઠ વર્ષ બાદ સુરતમાં નવરાત્રિમાં પરફોર્મ કરશે અને 22 ઓક્ટોબરે યશ્વી નવરાત્રિમાં ગરબાની રમઝટ બોલાવશે.
અમેરિકામાં વિઝાની મુશ્કેલીથી ગુજરાતી કલાકારોના ગરબા શો પર અસર
ગુજરાતી ગરબાની લોકપ્રિયતા વિદેશોમાં પણ જોવા મળે છે. દર વર્ષે નવરાત્રિ દરમિયાન અમેરિકા, કેનેડા અને ઓસ્ટ્રેલિયા સહિતના દેશોમાં ગુજરાતી કલાકારોના મોટા ગરબા કાર્યક્રમો યોજાય છે. જોકે, આ વર્ષે અમેરિકાના વિઝાને લઈને સર્જાયેલી મુશ્કેલીઓના કારણે કેટલાક કલાકારોના વિદેશી કાર્યક્રમો પર અસર પડી છે.
કિંજલ દવે, ફાલ્ગુની પાઠક અને ભૂમિ ત્રિવેદી સહિતના કલાકારોના અમેરિકા ખાતેના કેટલાક કાર્યક્રમો વિઝા સમયસર ન મળવાને કારણે રદ થયાની માહિતી સામે આવી છે. ખાસ કરીને મુખ્ય ગાયકો સાથે જતા બેકગ્રાઉન્ડ મ્યુઝિશિયન અને ગ્રુપ આર્ટિસ્ટ્સના વિઝા મંજૂર ન થવાથી આયોજકો માટે મુશ્કેલી ઊભી થઈ છે.
સામાન્ય રીતે ગીતા રબારી, પાર્થિવ ગોહિલ, કીર્તિદાન ગઢવી, ઐશ્વર્યા મજમુદાર, જીગરદાન ગઢવી, આદિત્ય ગઢવી અને અરવિંદ વેગડા જેવા કલાકારો વિદેશમાં ગુજરાતી ગરબાની ધૂમ મચાવતા હોય છે. પરંતુ આ વખતે વિઝા સંબંધિત મુશ્કેલીઓના કારણે કેટલાક કાર્યક્રમો રદ અથવા પ્રભાવિત થયા છે. જેના કારણે કલાકારોની સાથે વિદેશમાં ગરબાના આયોજન કરનારા આયોજકોને પણ વ્યવસ્થાપકીય અને આર્થિક અસરનો સામનો કરવો પડી રહ્યો છે.
આમ, 2026ની નવરાત્રિમાં ગુજરાત અને મુંબઈમાં પરંપરા, ભક્તિ, નવા લોકગીતો અને આધુનિક સંગીતનો સંગમ જોવા મળશે, જ્યારે વિદેશમાં વિઝા સંબંધિત મુશ્કેલીઓના કારણે કેટલાક ગુજરાતી ગરબા કાર્યક્રમો પર અસર જોવા મળી રહી છે.
