દ્રૌપદી મુર્મુ માત્ર 30 ગોલ્ડ મેડલ આપશે, બાકીના મેડલનું વિતરણ રાષ્ટ્રપતિના પ્રસ્થાન બાદ થશે
વડોદરા: એમ.એસ. યુનિવર્સિટીનો 25મો પદવીદાન સમારોહ 23 સપ્ટેમ્બરે કોન્વોકેશન ગ્રાઉન્ડ ખાતે યોજાશે. મુખ્ય અતિથિ તરીકે રાષ્ટ્રપતિ દ્રૌપદી મુર્મુ ઉપસ્થિત રહેવાના હોવાથી સમારોહની સામાન્ય પ્રક્રિયામાં કેટલાક ફેરફાર કરવામાં આવ્યા છે.
સમારોહમાં 161 વિદ્યાર્થીઓને કુલ 202 ગોલ્ડ મેડલ એનાયત થવાના છે. રાષ્ટ્રપતિને સમારોહ માટે મર્યાદિત સમય ફાળવવામાં આવ્યો હોવાથી તેમના હસ્તે માત્ર 30 વિદ્યાર્થીઓને ગોલ્ડ મેડલ આપવામાં આવશે. ત્યારબાદ દીક્ષાંત પ્રવચન પૂર્ણ કરીને રાષ્ટ્રપતિ પ્રસ્થાન કરશે. તેમના વિદાય કાર્યક્રમ બાદ થોડો વિરામ રાખીને બાકીના ગોલ્ડ મેડલનું વિતરણ કરવામાં આવશે.
રાષ્ટ્રપતિ સમારોહની શરૂઆતના પ્રોસેશનમાં પણ જોડાશે અને ગોલ્ડ મેડાલિસ્ટ વિદ્યાર્થીઓ તેમજ યુનિવર્સિટીની એક્ઝિક્યુટિવ કાઉન્સિલ અને બોર્ડ ઓફ મેનેજમેન્ટના સભ્યો સાથે ગ્રુપ ફોટોગ્રાફ પણ કરાવશે. જોકે, સમારોહના અંતિમ પ્રોસેશનમાં તેઓ હાજર રહેશે નહીં.
રાષ્ટ્રપતિ કાર્યાલયની 10 પાનાની સૂચનાઓ
રાષ્ટ્રપતિના પ્રોટોકોલને ધ્યાનમાં રાખીને યુનિવર્સિટી સત્તાધીશોને બેઠક વ્યવસ્થા, સ્ટેજ પર ગોલ્ડ મેડાલિસ્ટના આગમન સહિતની વિવિધ બાબતો અંગે વિગતવાર સૂચનાઓ આપવામાં આવી છે. રાષ્ટ્રપતિને આપવામાં આવનાર પાણી અને ભોજન અંગેની વિગતોનો પણ તેમાં સમાવેશ હોવાનું જાણવા મળ્યું છે. સાથે જ સ્ટેજ પર રાષ્ટ્રપતિને માત્ર એક સ્મૃતિચિહ્ન આપવાની સૂચના આપવામાં આવી છે.
અગાઉના સમારોહના અનુભવ બાદ તૈયારીઓમાં સાવચેતી
બે વર્ષ અગાઉ યોજાયેલા પદવીદાન સમારોહમાં પ્રવેશ વ્યવસ્થા અને ગોલ્ડ મેડલ વિતરણને લઈને થયેલી અવ્યવસ્થાની ચર્ચા થઈ હતી. ગૃહમંત્રી અમિત શાહની ઉપસ્થિતિમાં યોજાયેલા કાર્યક્રમ દરમિયાન મર્યાદિત ક્ષમતાવાળા સ્થળે પ્રવેશ માટે ભીડ અને ધક્કામુક્કીની સ્થિતિ સર્જાઈ હતી. બાદમાં મુખ્ય અતિથિના પ્રસ્થાન પછી બાકીના વિદ્યાર્થીઓને ફેકલ્ટી ડીન દ્વારા ગોલ્ડ મેડલ એનાયત કરવામાં આવ્યા હતા. આ અનુભવને ધ્યાનમાં રાખીને આ વખતે સમારોહની વ્યવસ્થા અને પ્રોટોકોલનું વિશેષ આયોજન કરવામાં આવી રહ્યું છે.
