શેરબજારમાં તેજી-મંદીની સ્થિતિ વચ્ચે પણ રોકાણકારોનો રસ યથાવત જોવા મળી રહ્યો છે. ઓગસ્ટ મહિનામાં નવા રોકાણકારોની નોંધણીના મામલે ગુજરાતે ઉત્તર પ્રદેશને પાછળ છોડીને દેશભરમાં પ્રથમ સ્થાન મેળવ્યું છે. એક જ મહિનામાં ગુજરાતમાં આશરે 2.3 લાખ નવા રોકાણકારો ઉમેરાયા હોવાનું નેશનલ સ્ટોક એક્સચેન્જ (NSE)ના અહેવાલમાં દર્શાવવામાં આવ્યું છે.
ગુજરાતની ખાસ વાત એ રહી કે દેશના સૌથી વધુ નવા રોકાણકારો ઉમેરાયેલા ટોપ-20 જિલ્લાઓમાંથી 10 જિલ્લા ગુજરાતના રહ્યા. અમદાવાદ, સુરત, ભાવનગર, રાજકોટ અને જૂનાગઢ ટોપ-10માં સ્થાન મેળવવામાં સફળ રહ્યા હતા. જ્યારે વડોદરા, મહેસાણા, બનાસકાંઠા, સુરેન્દ્રનગર અને જામનગર જેવા જિલ્લાઓએ પણ ટોપ-20માં સ્થાન મેળવ્યું છે.
અમદાવાદ-સુરત બાદ નાના શહેરોમાં પણ શેરબજારનો ક્રેઝ
ઓગસ્ટમાં સૌથી વધુ નવા રોકાણકારોની નોંધણી ધરાવતા જિલ્લાઓમાં દિલ્હી આશરે 75,800 નવા રોકાણકારો સાથે પ્રથમ ક્રમે રહ્યું હતું. મુંબઈમાં આશરે 53,300, અમદાવાદમાં 35,400, સુરતમાં 30,200 અને ભાવનગરમાં 26,800 નવા રોકાણકારો ઉમેરાયા હતા. રાજકોટમાં આશરે 18,800 નવા રોકાણકારોની નોંધણી થઈ હતી.
આ આંકડા દર્શાવે છે કે ગુજરાતમાં શેરબજારમાં રોકાણનો ટ્રેન્ડ હવે માત્ર અમદાવાદ, સુરત કે રાજકોટ જેવા મોટા શહેરો પૂરતો મર્યાદિત રહ્યો નથી. જામનગર અને સુરેન્દ્રનગર જેવા જિલ્લાઓની ટોપ-20માં એન્ટ્રીથી નાના અને મધ્યમ શહેરોમાં પણ શેરબજાર પ્રત્યેનું આકર્ષણ વધતું હોવાનું જોવા મળે છે.
ગુજરાતમાં રોકાણકારોની સંખ્યામાં મોટો વધારો
NSEના અહેવાલ મુજબ ગુજરાતમાં રોકાણકારોની સંખ્યામાં છેલ્લા કેટલાક વર્ષોમાં નોંધપાત્ર વધારો થયો છે. 2010માં રાજ્યમાં આશરે 14.98 લાખ રોકાણકારો હતા, જે 2015માં વધીને 20.55 લાખ અને 2020માં 37.97 લાખ થયા હતા. ચાલુ વર્ષે ઓગસ્ટના અંત સુધીમાં આ સંખ્યા વધીને આશરે 1.15 કરોડ સુધી પહોંચી ગઈ છે.
રાજ્યવાર નવા રોકાણકારોની નોંધણીમાં ઓગસ્ટ દરમિયાન ગુજરાતમાં આશરે 2.3 લાખ નવા રોકાણકારો ઉમેરાયા હતા. ઉત્તર પ્રદેશમાં આશરે 2 લાખ, મહારાષ્ટ્રમાં 1.6 લાખ, રાજસ્થાનમાં 1.1 લાખ અને તમિલનાડુમાં આશરે 90 હજાર નવા રોકાણકારો ઉમેરાયા હતા.
ટોપ-20માં ગુજરાતના 10 જિલ્લાઓ
ઓગસ્ટના આંકડામાં ગુજરાતના 10 જિલ્લાઓનું ટોપ-20માં સ્થાન મેળવવું રાજ્યના રોકાણકાર આધારના વિસ્તરણ તરફ સંકેત આપે છે. અગાઉ સપ્ટેમ્બર 2024માં પણ અમદાવાદ, સુરત, રાજકોટ અને ભાવનગર સહિત ગુજરાતના ચાર જિલ્લાઓ ટોપ-10માં સ્થાન મેળવી ચૂક્યા હતા.
નવા રોકાણકારોની વધતી સંખ્યા પાછળ IPOમાં વધતો રસ, ડિજિટલ માધ્યમથી સરળતાથી શેરબજારમાં પ્રવેશ અને નાના શહેરોમાં રોકાણ અંગે વધતી જાગૃતિ જેવા પરિબળો જવાબદાર હોવાનું બજાર નિષ્ણાતો માને છે. જોકે, નવા રોકાણકારોની સંખ્યા વધવી એ શેરબજારમાં રોકાણના વળતર કે જોખમ અંગેનો સીધો સંકેત નથી.
