સૌરાષ્ટ્ર-ગુજરાતમાં ચોમાસાની વિદાયની પ્રક્રિયા વચ્ચે કાલથી ફરી ત્રણ દિવસ છૂટાછવાયા ઝાપટાં અને હળવા વરસાદની શક્યતા વ્યક્ત કરવામાં આવી છે. જાણીતા વેધર એનાલિસ્ટ અશોકભાઈ પટેલના જણાવ્યા મુજબ, વિવિધ હવામાન મોડલમાં અલગ-અલગ સ્થિતિ જોવા મળી રહી છે, તેમ છતાં કેટલાક વિસ્તારોમાં આઈસોલેટેડ વરસાદી ઝાપટાં પડી શકે છે.
તેમના જણાવ્યા પ્રમાણે ગુજરાત રીજીયનમાં આજથી 2 ઓક્ટોબર સુધી અને સૌરાષ્ટ્ર-કચ્છમાં કાલથી 2 ઓક્ટોબર સુધી છૂટાછવાયા ઝાપટાં પડવાની શક્યતા છે. ખાસ કરીને સૌરાષ્ટ્રના કેટલાક વિસ્તારોમાં હળવો વરસાદ ફરી જોવા મળી શકે છે.
હવામાન વિભાગના પરિબળો અંગે તેમણે જણાવ્યું કે મ્યાનમાર નજીકનું ડીપ ડિપ્રેશન નબળું પડીને ડિપ્રેશનમાં પરિવર્તિત થયું છે અને ત્યારબાદ વધુ નબળું પડી લો-પ્રેશર વિસ્તારમાં ફેરવાઈ શકે છે. આ સિસ્ટમની ગતિ અને તેની સાથે જોડાયેલા વાતાવરણીય પરિબળોની અસરથી આગામી દિવસોમાં ગુજરાતના કેટલાક વિસ્તારોમાં વરસાદી પ્રવૃત્તિ જોવા મળી શકે છે.
દરમિયાન દક્ષિણ-પશ્ચિમ ચોમાસાની રેખા ગુજરાતમાંથી પસાર થઈ રહી છે, જ્યારે દક્ષિણ રાજસ્થાન અને આસપાસના વિસ્તારોમાં અપર-એર સાયક્લોનિક સર્ક્યુલેશન સક્રિય છે. આ હવામાન પરિબળો પણ ગુજરાતમાં છૂટાછવાયા વરસાદ માટે અનુકૂળ બની રહ્યા છે.
આગામી ત્રણ દિવસ સૌરાષ્ટ્ર-ગુજરાતના કેટલાક વિસ્તારોમાં હળવા વરસાદ અને ઝાપટાંની શક્યતા, જ્યારે અન્ય વિસ્તારોમાં હવામાન મોટાભાગે સૂકું રહેવાની સંભાવના છે.
