ગાંધીનગર મહાનગરપાલિકા ચૂંટણીને લઈને ભાજપ પ્રદેશ અધ્યક્ષ જગદીશ વિશ્વકર્માની અધ્યક્ષતામાં તથા નાયબ મુખ્યમંત્રી હર્ષ સંઘવી અને પ્રદેશ સંગઠન મહામંત્રી રત્નાકરની ઉપસ્થિતિમાં કાર્યકર્તા સંકલન બેઠક યોજાઈ હતી. ભાજપ દ્વારા પણ ગાંધીનગર મનપા ચૂંટણી માટે સંગઠનાત્મક તૈયારીઓ અને ચૂંટણીલક્ષી જવાબદારીઓ અંગે કામગીરી શરૂ કરાઈ હોવાની માહિતી ઉપલબ્ધ છે.
બેઠકમાં જનસંપર્ક, બુથ સ્તરની કામગીરી અને સંગઠનાત્મક સંકલન વધુ મજબૂત બનાવવા અંગે માર્ગદર્શન આપવામાં આવ્યું. પ્રદેશ અધ્યક્ષ જગદીશ વિશ્વકર્માએ બુથ કાર્યકર્તાઓને સંગઠનની મહત્વપૂર્ણ કડી ગણાવીને નાગરિકો સાથે સીધો સંપર્ક વધારવા પર ભાર મૂક્યો.
નાયબ મુખ્યમંત્રી હર્ષ સંઘવીએ ગાંધીનગરના વિકાસ અને નાગરિકોની જરૂરિયાતોને કેન્દ્રમાં રાખીને કામગીરી કરવા કાર્યકર્તાઓને માર્ગદર્શન આપ્યું. બેઠકમાં ગાંધીનગર શહેર ભાજપના અધ્યક્ષ ડો. આશિષ દવે સહિત મોટી સંખ્યામાં આગેવાનો અને કાર્યકર્તાઓ હાજર રહ્યા હતા.
