રાજકોટના આજીડેમ પોલીસે પાર્ક કરેલી બોલેરો પીકઅપના ટાયર ચોરી કરતી બે વ્યક્તિને ઝડપી પાડી છે. પોલીસના જણાવ્યા મુજબ બંને આરોપીઓ બોલેરો પીકઅપના ડ્રાઈવર તરીકે ભાડે જતા અને અલગ-અલગ વિસ્તારોમાં રેકી કરીને પાર્ક કરેલી બોલેરોને નિશાન બનાવતા હતા.
આરોપીઓ વાહનના પાછળના ટાયર કાઢી લઈ અન્ય બોલેરો ચાલકોને સસ્તા ભાવે વેચી મારતા હોવાનું પોલીસ તપાસમાં સામે આવ્યું છે. પોલીસે આરોપીઓ પાસેથી વ્હીલ પ્લેટ સાથે 16 ટાયર, વાહન ઊંચકવા માટેનો જેક અને એક કાર સહિત કુલ ₹6.91 લાખનો મુદ્દામાલ કબજે કર્યો છે.
આજીડેમ પોલીસ સ્ટેશન વિસ્તારમાં હલેન્ડા ગામ બસ સ્ટેન્ડ, કાળીપાટ ચોકડી પાસેની મોમાઈ હોટલ અને ગોંડલ રોડ પર મીરા પાપડ સામેથી બોલેરોના ટાયર ચોરીની ફરિયાદો નોંધાઈ હતી. ગુનાઓના પગલે પોલીસે ટેક્નિકલ સર્વેલન્સ અને હ્યુમન સોર્સની મદદથી તપાસ હાથ ધરી હતી.
પેટ્રોલિંગ દરમિયાન મળેલી બાતમીના આધારે પોલીસે **કોઠારીયા સોલવંટ-સોમનાથ ઇન્ડસ્ટ્રીઝના ગેટ પાસેના ખુલ્લા પ્લોટમાંથી લાલજી કરશન મેઘાણી (29) અને રાહુલ બાઘા ચિરોડિયા (26)**ને ઝડપી લીધા હતા. બંનેની પૂછપરછમાં સૌરાષ્ટ્રના વિવિધ વિસ્તારોમાંથી ટાયર ચોરી કર્યાની કબૂલાત આપી હોવાનું પોલીસે જણાવ્યું છે.
પોલીસ મુજબ આરોપીઓએ ખંભાળિયા, બેડીપરા, પડધરી, માધાપર ચોકડી, માંડાડુંગર, વાંકાનેર, નવાગામ, હુડકો ચોકડી, શાપર-ગોંડલ રોડ, મોરબી રોડ અને કુવાડવા ચોકડી સહિતના વિસ્તારોમાંથી અલગ-અલગ સમયે બોલેરોના ટાયર ચોરી કર્યા હોવાની કબૂલાત આપી છે.
પોલીસે અગાઉ નોંધાયેલા ગુનાઓ સાથે આ બંને આરોપીઓની સંડોવણી અંગે વધુ તપાસ હાથ ધરી છે.
