નવી દિલ્હીમાં યોજાયેલી **‘રાષ્ટ્રીય કૃષિ પરિષદ-રવિ અભિયાન 2026’**માં ગુજરાતના કૃષિ મંત્રી જીતુભાઈ વાઘાણીએ રાજ્યના ખેડૂતોના હિતને લગતી વિવિધ મહત્વપૂર્ણ માંગણીઓ કેન્દ્ર સરકાર સમક્ષ રજૂ કરી હતી. પરિષદમાં ગુજરાતની રવિ સિઝનની તૈયારીઓ, કૃષિ ક્ષેત્રની કામગીરી અને ખેડૂતો માટેની યોજનાઓ અંગે પણ માહિતી આપવામાં આવી.
PM-આશા યોજના હેઠળ કઠોળ અને તેલીબિયાંના કુલ ઉત્પાદનમાંથી ટેકાના ભાવે થતી ખરીદીનો હિસ્સો 25%થી વધારીને 40% કરવાની મંજૂરી આપવા કેન્દ્ર સરકાર સમક્ષ માંગ કરવામાં આવી છે. ગુજરાતમાં દિવેલાનું ઉત્પાદન દેશમાં અગ્રેસર હોવાથી દિવેલાને પણ PM-આશા યોજનાના દાયરામાં સામેલ કરવા રજૂઆત કરાઈ છે.
મંત્રી વાઘાણીએ જણાવ્યું કે, ગુજરાતમાં રવિ સિઝન માટે પૂરતા પ્રમાણમાં બિયારણનો જથ્થો ઉપલબ્ધ છે. રાજ્ય સરકારે વર્ષ 2026-27 માટે કૃષિ બજેટ વધારીને રૂ.17 હજાર કરોડથી વધુ કર્યું છે. આ ઉપરાંત આદિવાસી વિસ્તારોના ખેડૂતોને ઘરઆંગણે ખેતી અંગેની સેવાઓ અને માર્ગદર્શન મળી રહે તે માટે 14 જિલ્લાના 53 તાલુકામાં ‘કિસાન સુવિધા રથ’ શરૂ કરવાની યોજના છે.
રાજ્યમાં પાણીના કરકસરયુક્ત ઉપયોગ માટે સૂક્ષ્મ સિંચાઈને પણ પ્રોત્સાહન આપવામાં આવી રહ્યું છે. અત્યાર સુધીમાં 25.91 લાખ હેક્ટર વિસ્તાર સૂક્ષ્મ સિંચાઈ હેઠળ આવરી લેવાયો છે, જ્યારે ચાલુ વર્ષે વધુ 2 લાખ હેક્ટર વિસ્તારને આવરી લેવા માટે રૂ.1,250 કરોડની જોગવાઈ કરવામાં આવી છે.
બિયારણ, ખાતર અને જંતુનાશક દવાઓની ગુણવત્તા જાળવવા રાજ્યમાં હાથ ધરાયેલી તપાસ અંગે પણ કેન્દ્રને માહિતી આપવામાં આવી. અગાઉની તપાસમાં 26 FIR અને 246 લાઇસન્સ સસ્પેન્ડ કરવામાં આવ્યા હતા, જ્યારે ચાલુ વર્ષે 94 ટીમોએ 3,760 સ્થળે તપાસ કરી 136 લાઇસન્સ રદ અથવા સ્થગિત કર્યા અને 15 FIR નોંધાઈ છે.
આ ઉપરાંત ભેળસેળ અટકાવવા વધુ કડક કાયદા, નેનો ફર્ટિલાઇઝરના સેમ્પલ ટેસ્ટિંગ માટે અંતિમ પ્રોટોકોલ ઝડપથી જાહેર કરવા અને એગ્રીસ્ટેક હેઠળ મળતા સ્પેશિયલ સેન્ટ્રલ આસિસ્ટન્સ ફંડનો આગામી વર્ષોમાં ઉપયોગ કરવાની છૂટ આપવા પણ કેન્દ્ર સમક્ષ રજૂઆત કરવામાં આવી છે. કૃષિ યાંત્રિકીકરણ યોજના હેઠળ અરજી કરનારા 9,000થી વધુ ખેડૂતોને લાભ મળી રહે તે માટે વધારાનું ફંડ ફાળવવાની માંગ પણ કરાઈ છે.
