ગાંધીનગર: ગુજરાત ગૌણ સેવા પસંદગી મંડળ (GSSSB)ના ચેરમેન તુષાર ધોળકિયાના કાર્યકાળને લઈને રાજ્ય સરકારે મહત્વપૂર્ણ નિર્ણય લીધો છે. સરકારે તેમના કાર્યકાળમાં વધુ બે વર્ષનો વધારો કરવાનો નિર્ણય લીધો છે. આ નિર્ણય બાદ હવે તુષાર ધોળકિયા વર્ષ 2028 સુધી GSSSBના ચેરમેન તરીકે જવાબદારી સંભાળશે.
તુષાર ધોળકિયાનો GSSSBના ચેરમેન તરીકેનો નિયમિત કાર્યકાળ 30 સપ્ટેમ્બરે પૂર્ણ થવાનો હતો. જોકે, કાર્યકાળ પૂર્ણ થવાના દિવસે જ રાજ્ય સરકારે તેમની મુદત વધુ બે વર્ષ લંબાવવાનો નિર્ણય લીધો છે.
રાજ્ય સરકારના આ નિર્ણય બાદ તુષાર ધોળકિયા આગામી બે વર્ષ સુધી ગૌણ સેવા પસંદગી મંડળનું નેતૃત્વ કરશે. ગુજરાત સરકારના વિવિધ વિભાગોમાં વર્ગ-3ની જગ્યાઓ માટે ભરતી અને સ્પર્ધાત્મક પરીક્ષાઓ યોજવાની મહત્વપૂર્ણ જવાબદારી GSSSBની છે.
આગામી સમયમાં વિવિધ વર્ગ-3ની ભરતી પ્રક્રિયાઓ યોજાવાની હોવાથી ચેરમેનના કાર્યકાળમાં વધારો થતાં મંડળની કામગીરીમાં સાતત્ય જળવાઈ રહે તેવી શક્યતા છે. GSSSB દ્વારા ભરતી પરીક્ષાઓનું આયોજન, પરીક્ષા પ્રક્રિયા, પરિણામ સહિતની વિવિધ કામગીરી કરવામાં આવે છે.
આ નિર્ણય બાદ હવે તુષાર ધોળકિયા 2028 સુધી GSSSBના ચેરમેન પદે રહેશે અને આગામી સમયમાં યોજાનારી વિવિધ વર્ગ-3ની ભરતી પ્રક્રિયાઓમાં મંડળની કામગીરીનું નેતૃત્વ કરશે.
