નવી દિલ્હી: વર્ષ 2008ના અમદાવાદ શ્રેણીબદ્ધ બોમ્બ બ્લાસ્ટ કેસમાં સુપ્રીમ કોર્ટે મહત્વપૂર્ણ આદેશ આપ્યો છે. સુપ્રીમ કોર્ટે 38 દોષિતોમાંના એક અહમદ બાવા ઉર્ફે અબ્બુ અબુબકર બરેલવીની ફાંસીની સજાના અમલ પર હાલ પૂરતી રોક લગાવી છે. જસ્ટિસ વિક્રમ નાથ, જસ્ટિસ સંદીપ મહેતા અને જસ્ટિસ ઑગસ્ટિન જ્યોર્જ મસીહની ખંડપીઠે ગુજરાત સરકારને નોટિસ પાઠવી છે.
અહમદ બાવાએ ગુજરાત હાઇકોર્ટના જુલાઈ 2026ના ચુકાદાને સુપ્રીમ કોર્ટમાં પડકાર્યો હતો. ગુજરાત હાઇકોર્ટે વિશેષ અદાલત દ્વારા 38 દોષિતોને ફટકારવામાં આવેલી ફાંસીની સજા અને 11 દોષિતોને આપવામાં આવેલી આજીવન કેદની સજાને યથાવત રાખી હતી. આ ચુકાદા સામે અહમદ બાવાએ સુપ્રીમ કોર્ટમાં અપીલ કરી હતી.
સુપ્રીમ કોર્ટમાં અહમદ બાવાના વકીલે દલીલ કરી હતી કે તેની દોષિત ઠરાવવાની કાર્યવાહી મુખ્યત્વે કાવતરાના આરોપ પર આધારિત છે. સુનાવણી દરમિયાન કોર્ટે ફાંસીની સજાના અમલ પર રોક લગાવી અને ગુજરાત સરકારનો જવાબ માંગ્યો છે. ટ્રાયલ કોર્ટના રેકોર્ડ સાથે સંબંધિત દસ્તાવેજો પણ મંગાવવામાં આવ્યા છે.
ઉલ્લેખનીય છે કે 26 જુલાઈ 2008ના રોજ અમદાવાદમાં શ્રેણીબદ્ધ બોમ્બ વિસ્ફોટ થયા હતા, જેમાં 56 લોકોનાં મોત થયા હતા અને 200થી વધુ લોકો ઘાયલ થયા હતા. ફેબ્રુઆરી 2022માં વિશેષ અદાલતે 49 આરોપીઓને દોષિત ઠેરવ્યા હતા, જેમાંથી 38ને ફાંસી અને 11ને આજીવન કેદની સજા ફટકારવામાં આવી હતી. અન્ય 28 આરોપીઓને નિર્દોષ જાહેર કરવામાં આવ્યા હતા.
હવે અહમદ બાવાની અપીલ પર સુપ્રીમ કોર્ટમાં આગળની કાર્યવાહી હાથ ધરાશે. હાલનો આદેશ માત્ર તેની ફાંસીની સજાના અમલ પર રોક સંબંધિત છે; કેસની અંતિમ અપીલ પરનો નિર્ણય હજુ બાકી છે.
