અમદાવાદ: અમદાવાદના પાલડી વિસ્તારમાંથી ₹109 કરોડથી વધુની કિંમતનો સોનાનો જથ્થો સહિતની ચીજવસ્તુઓ મળી આવવાના કેસમાં આરોપીઓને અદાલતે આગોતરા જામીન મંજૂર કર્યા છે. DRI અને ગુજરાત ATSની સંયુક્ત કાર્યવાહી દરમિયાન આ જપ્તી કરવામાં આવી હતી.
માર્ચ 2025માં બે દિવસ સુધી ચાલેલા સર્ચ ઓપરેશન દરમિયાન પાલડીની મહાલક્ષ્મી સોસાયટીના આવિષ્કાર એપાર્ટમેન્ટના ફ્લેટ નંબર 104માંથી 882 સોનાના બિસ્કિટ, સોનાના દાગીના, બે ઘડિયાળના બેલ્ટ, 10 કિંમતી ઘડિયાળો, મોબાઈલ ફોન અને ભારતીય ચલણી નોટો મળી આવી હતી. જપ્ત કરાયેલી તમામ વસ્તુઓની કુલ કિંમત ₹109,33,83,948 આંકવામાં આવી હતી.
તપાસ દરમિયાન સામે આવ્યું હતું કે જે ફ્લેટમાંથી આ જથ્થો મળી આવ્યો હતો તે અરજદાર મેઘકુમાર મહેન્દ્રકુમાર શાહ અને તેમના પિતાએ દરોડાના થોડા મહિના અગાઉ ભાડે લીધો હતો.
તપાસમાં સહકારને ધ્યાનમાં રાખી કોર્ટનો નિર્ણય
કેસની સુનાવણી દરમિયાન અદાલતે નોંધ્યું હતું કે સર્વોચ્ચ અદાલત દ્વારા વચગાળાનું રક્ષણ મળ્યા બાદ અરજદારોએ તપાસમાં સહયોગ આપ્યો હતો. તેઓ કસ્ટમ્સ એક્ટની કલમ 108 હેઠળ જારી કરાયેલા સમન્સનું પાલન કરીને તપાસ અધિકારીઓ સમક્ષ હાજર પણ થયા હતા.
કોર્ટ સમક્ષ એવું કોઈ રેકોર્ડ રજૂ થયું નહોતું કે અરજદારોએ તપાસ ટાળી હોય અથવા જરૂરી માહિતી આપવાનો ઇનકાર કર્યો હોય. કસ્ટમ્સ વિભાગ તરફથી પણ અરજદારોની કસ્ટોડિયલ પૂછપરછ શા માટે જરૂરી છે અને કસ્ટડી વિના તપાસનો કયો હેતુ પૂર્ણ થઈ શકતો નથી તે દર્શાવી શકાયું નહોતું.
અદાલતે સ્પષ્ટ કર્યું કે કસ્ટમ્સ એક્ટની કલમ 104 હેઠળ અધિકારીઓને ધરપકડ કરવાની સત્તા છે, પરંતુ માત્ર કાયદાકીય સત્તા હોવાના કારણે દરેક કેસમાં ધરપકડ કરવી જરૂરી નથી. ધરપકડની જરૂરિયાત કેસના તથ્યો અને સંજોગો પર આધારિત રહે છે.
અરજદારોએ અત્યાર સુધી તપાસમાં આપેલા સહયોગ, કસ્ટમ્સના સમન્સનું પાલન અને આગળ પણ તપાસમાં ઉપલબ્ધ રહેવાની તૈયારીને ધ્યાનમાં રાખીને કોર્ટે તેમને કસ્ટડીમાં લીધા વિના પણ તપાસ આગળ વધારી શકાય તેમ માન્યું હતું.
આ આધારે અદાલતે આરોપીઓની આગોતરા જામીન અરજીઓ મંજૂર કરી અને તપાસમાં સતત સહકાર આપવા સહિતની શરતોને આધીન રહી ધરપકડ સામે રક્ષણ આપતો આદેશ કર્યો હતો.
