ગુજરાતની RTO કચેરીઓમાં શરૂ કરાયેલી AI આધારિત કાર ડ્રાઈવિંગ ટેસ્ટમાં નાપાસ થનારા ઉમેદવારોની સંખ્યામાં વધારો થતાં હવે નિયમોમાં આંશિક છૂટછાટ આપવાની શક્યતા ઊભી થઈ છે. હાલ દર પાંચમાંથી માત્ર એક એટલે કે આશરે 20 ટકા ઉમેદવારો જ ટેસ્ટમાં પાસ થઈ રહ્યા છે, જ્યારે 80 ટકા ઉમેદવારો નાપાસ થતાં ફરી ટેસ્ટ માટેની એપોઈન્ટમેન્ટનું વેઇટિંગ વધી રહ્યું છે. આ સમસ્યાના ઉકેલ માટે રાજ્ય સરકાર ટેસ્ટની સમયમર્યાદા અને કેટલાક ટેકનિકલ માપદંડોમાં રાહત આપવા અંગે વિચારણા કરી રહી છે.
અમદાવાદની સુભાષબ્રિજ અને વસ્ત્રાલ RTO કચેરીઓમાં પરિસ્થિતિ વધુ ગંભીર બની છે. અહીં ડ્રાઈવિંગ ટેસ્ટ માટે અરજી કરનારા ઉમેદવારોને દોઢથી બે મહિના પછીની એપોઈન્ટમેન્ટ મળી રહી છે. સુભાષબ્રિજ RTOના પ્રાદેશિક વાહનવ્યવહાર અધિકારી બી. આર. સૂર્યવંશીના જણાવ્યા અનુસાર, હાલમાં દરરોજ 140 કાર અને 200 ટુ-વ્હીલર માટે એપોઈન્ટમેન્ટ આપવામાં આવે છે. તેમ છતાં, મોટી સંખ્યામાં ઉમેદવારો ફરીથી ટેસ્ટ આપવા આવતા વેઇટિંગ પિરિયડ સતત વધી રહ્યો છે.
AI ડ્રાઈવિંગ ટેસ્ટમાં ઉમેદવારો માટે ‘રિવર્સ S’ આકારમાં વાહન ચલાવવું, યોગ્ય રીતે પાર્કિંગ કરવું અને પીળી લાઇનને સ્પર્શ કર્યા વિના ટ્રેક પૂર્ણ કરવો સૌથી મોટો પડકાર બની રહ્યો છે. આ ઉપરાંત, ટેસ્ટ પૂર્ણ કરવા માટેની નિર્ધારિત સમયમર્યાદા પણ મુશ્કેલી ઊભી કરી રહી છે. વાહનની સ્થિતિ યોગ્ય કરવામાં જ વધુ સમય પસાર થઈ જતાં ઘણા ઉમેદવારો સમયસર ટેસ્ટ પૂર્ણ કરી શકતા નથી અને સોફ્ટવેર દ્વારા તેમને નાપાસ જાહેર કરવામાં આવે છે.
આ સમસ્યાને ધ્યાનમાં રાખીને ગાંધીનગરમાં પરિવહન વિભાગના ઉચ્ચ અધિકારીઓની મહત્વપૂર્ણ બેઠક યોજાઈ છે. જોકે, અધિકારીઓના જણાવ્યા મુજબ, કેન્દ્ર સરકારની માર્ગદર્શિકા અનુસાર નક્કી કરાયેલા AI ટ્રેકના માપ અને ડિઝાઇનમાં ફેરફાર કરવો શક્ય નથી. તેથી રાજ્ય સરકાર ટ્રેકની ડિઝાઇન બદલવાને બદલે ટેસ્ટ પૂર્ણ કરવા માટેની સમયમર્યાદા અને અન્ય ટેકનિકલ માપદંડોમાં આંશિક રાહત આપવા અંગે વિચારણા કરી રહી છે.
જો સરકાર દ્વારા નિયમોમાં છૂટછાટ આપવાનો નિર્ણય લેવામાં આવશે, તો ડ્રાઈવિંગ લાયસન્સ મેળવવા ઇચ્છતા હજારો ઉમેદવારોને રાહત મળી શકે છે. તેનાથી ટેસ્ટમાં પાસ થનારા ઉમેદવારોની સંખ્યામાં વધારો થવાની અને RTO કચેરીઓમાં વધી રહેલા એપોઈન્ટમેન્ટના બેકલોગમાં ઘટાડો થવાની શક્યતા છે. આ ઉપરાંત, આગામી વર્ષે સુભાષબ્રિજ RTO ખાતે નવો ડ્રાઈવિંગ ટ્રેક બનાવવાનું પણ આયોજન છે, જેથી ભવિષ્યમાં ટેસ્ટ માટેની વધતી ભીડ અને વેઇટિંગની સમસ્યામાં રાહત મળી શકે. જોકે, નિયમોમાં છૂટછાટ અંગેનો અંતિમ નિર્ણય હજુ બાકી છે.
