તિરુપતિ લાડુ અને પલાની પંચામૃતમ બાદ અંબાજીનો મોહનથાળ પણ વિશિષ્ટ મંદિર પ્રસાદોની યાદીમાં સામેલ; 11 ઓક્ટોબરે વિશેષ સમારોહ યોજાશે
પ્રસિદ્ધ યાત્રાધામ અંબાજી મંદિરના પરંપરાગત મોહનથાળ પ્રસાદને કેન્દ્રીય જિયોગ્રાફિકલ ઇન્ડિકેશન્સ (GI) રજિસ્ટ્રી દ્વારા GI ટેગ એનાયત કરવામાં આવ્યો છે. આ સાથે મોહનથાળને તેની વિશિષ્ટ ભૌગોલિક ઓળખ અને પરંપરાગત નામ માટે કાનૂની સંરક્ષણ પ્રાપ્ત થયું છે. તિરુપતિના લાડુ અને પલાની પંચામૃતમની જેમ હવે અંબાજીનો મોહનથાળ પણ દેશના વિશિષ્ટ મંદિર પ્રસાદોમાં સામેલ થયો છે.
શ્રી આરાસુરી અંબાજી માતા દેવસ્થાન ટ્રસ્ટ દ્વારા કરવામાં આવેલી અરજીના આધારે મોહનથાળને ખાદ્ય પદાર્થોની ક્લાસ-30 શ્રેણી હેઠળ સત્તાવાર GI ટેગ આપવામાં આવ્યો છે. અધિકૃત દસ્તાવેજો અનુસાર, 1 ઓક્ટોબર, 2026ના રોજ આ અંગેનું પ્રમાણપત્ર જારી કરવામાં આવ્યું હતું.
11 ઓક્ટોબરે વિશેષ સમારોહનું આયોજન
આ ઐતિહાસિક સિદ્ધિની ઉજવણી નિમિત્તે નવરાત્રિના પ્રથમ નોરતે, એટલે કે 11 ઓક્ટોબરે, અંબાજી દેવસ્થાન ખાતે વિશેષ સમારોહ યોજાશે. સવારે 10થી 11 વાગ્યા દરમિયાન યોજાનારા આ કાર્યક્રમમાં કંટ્રોલર જનરલ ઓફ પેટન્ટ્સ, ડિઝાઇન્સ એન્ડ ટ્રેડમાર્ક્સ તથા GI રજિસ્ટ્રાર પ્રોફેસર ડૉ. ઉન્નત પી. પંડિત ઉપસ્થિત રહી દેવસ્થાન ટ્રસ્ટને સત્તાવાર GI પ્રમાણપત્ર અર્પણ કરશે.
મોહનથાળની પરંપરાગત ઓળખને મળશે રક્ષણ
GI ટેગ મળવાથી ‘અંબાજી મોહનથાળ’ નામના અનધિકૃત ઉપયોગ અને નકલ સામે કાનૂની રક્ષણ મેળવવામાં મદદ મળશે. આ ઉપરાંત પ્રસાદની પરંપરાગત ઓળખ, ગુણવત્તા અને શુદ્ધતા જાળવવા માટે પણ આ સિદ્ધિ મહત્વપૂર્ણ સાબિત થશે. અંબાજી મંદિરની ધાર્મિક પરંપરા સાથે જોડાયેલા આ પ્રસાદને રાષ્ટ્રીય સ્તરે વિશિષ્ટ ઓળખ મળતાં શ્રદ્ધાળુઓમાં પણ આનંદની લાગણી જોવા મળી રહી છે.
