બર્ગર-સેન્ડવિચમાં વપરાતા સોસના ઉત્પાદન એકમ પર AMCના ફૂડ વિભાગનો દરોડો; લાયસન્સના અભાવે અને અસ્વચ્છતા વચ્ચે ચાલતી ફેક્ટરી સીલ
અમદાવાદ: શહેરમાં ખાદ્યપદાર્થોની ગુણવત્તા સામે સવાલો ઊભા કરતી ઘટના સામે આવી છે. અમદાવાદ મ્યુનિસિપલ કોર્પોરેશન (AMC)ના ફૂડ વિભાગે દાણીલીમડા-પીરાણા રોડ પર બહેરામપુરા વિસ્તારમાં દરોડો પાડી કથિત રીતે હલકી ગુણવત્તાનો ટોમેટો સોસ બનાવતી ફેક્ટરી ઝડપી પાડી છે. સ્થળ પરથી અંદાજે 2,000 કિલો કાચો માલ અને તૈયાર સોસનો જથ્થો જપ્ત કરીને એકમને સીલ કરવામાં આવ્યો છે.
ટામેટાંના બદલે બટાકાનો પાવડર વપરાતો હોવાનો આક્ષેપ
ફૂડ વિભાગની તપાસ દરમિયાન સોસ બનાવવામાં ટામેટાંના બદલે બટાકાના પાવડર તેમજ એસિડિક કલર સહિતની રાસાયણિક સામગ્રીનો ઉપયોગ થતો હોવાની વિગતો સામે આવી હતી. ફેક્ટરીમાં સ્વચ્છતાના નિયમોનું પણ પાલન થતું ન હોવાનું તપાસમાં જાણવા મળ્યું હતું.
આ એકમમાં તૈયાર થતો સોસ બર્ગર, સેન્ડવિચ સહિતના ફાસ્ટફૂડમાં ઉપયોગ માટે અલગ-અલગ દુકાનો અને ખાણીપીણીની લારીઓ સુધી પહોંચાડવામાં આવતો હોવાની માહિતી છે.
લાયસન્સ અને ખરીદ-વેચાણનાં બિલનો અભાવ
ફૂડ વિભાગની પૂછપરછમાં એકમના સંચાલકો પાસે સ્થળનું માન્ય લાયસન્સ ન હોવાનું સામે આવ્યું હતું. લાયસન્સમાં દર્શાવેલું સરનામું પણ શંકાસ્પદ હોવાનું તપાસમાં જાણવા મળ્યું હતું. ‘ટેસ્ટી સ્નેક્સ કેચઅપ’ નામે સોસનું ઉત્પાદન કરીને વેચાણ કરવામાં આવતું હોવાની વિગતો પણ સામે આવી છે.
અધિકારીઓએ ખરીદ-વેચાણનાં બિલ માગતાં સંચાલકો તે રજૂ કરી શક્યા નહોતા. આથી ઉત્પાદન અને વેચાણની પ્રક્રિયા અંગે પણ તપાસ હાથ ધરવામાં આવી છે.
2,000 કિલો જથ્થાના નિકાલની કાર્યવાહી
ફૂડ વિભાગે સ્થળ પરથી કાચા માલ અને તૈયાર સોસનો આશરે 2,000 કિલો જથ્થો કબજે કર્યો છે. જપ્ત કરાયેલા માલના નમૂના લેવામાં આવ્યા છે અને તેને નાશ કરવાની કાયદેસરની પ્રક્રિયા હાથ ધરવામાં આવી રહી છે. સાથે જ ગેરકાયદે રીતે ચાલતા આ એકમને સીલ કરી દેવામાં આવ્યો છે.
આ કાર્યવાહીથી શહેરમાં ફાસ્ટફૂડ માટે વપરાતા સોસની ગુણવત્તા અને ખાદ્ય સુરક્ષાને લઈને ફરી એકવાર સવાલો ઊભા થયા છે.
