નવરાત્રિ દરમિયાન સામાન લઈ જતી ટ્રોલીનું નિયંત્રણ ખોરવાયું; ઘટનાની જાણ થતાં અધિકારીઓ અને પોલીસ દોડી પહોંચ્યાં
પાવાગઢ: આસો નવરાત્રિ દરમિયાન પાવાગઢમાં શ્રી કાલિકા માતાજીનાં દર્શન માટે મોટી સંખ્યામાં શ્રદ્ધાળુઓ ઉમટી રહ્યા છે. આ દરમિયાન માચીથી ડુંગર પર સામાન પહોંચાડતા માલવાહક રોપ-વેમાં અકસ્માતની ઘટના સામે આવી છે. ટ્રોલીનું નિયંત્રણ ખોરવાતાં ટ્રોલી અને મશીન નીચે પટકાયાં હતાં અને રોપ-વેના ફાઉન્ડેશન સાથે અથડાયાં હતાં. સદનસીબે આ ઘટનામાં કોઈ જાનહાનિ થઈ ન હતી.
ઉષા બ્રેકો કંપનીના માલવાહક રોપ-વેમાં ખામી
મળતી માહિતી મુજબ, પાવાગઢમાં ઉષા બ્રેકો કંપની દ્વારા સંચાલિત માલવાહક રોપ-વે મારફતે સામાન ડુંગર પર લઈ જવામાં આવતો હતો. આ દરમિયાન ટ્રોલીનું નિયંત્રણ ખોરવાતાં ટ્રોલી અને મશીન નીચે ધસી આવ્યાં હતાં. ઘટનાને પગલે સ્થળ પર અફરાતફરીનો માહોલ સર્જાયો હતો.
બનાવની જાણ થતાં સ્થાનિક અધિકારીઓ, હાલોલના સબ-ડિવિઝનલ મેજિસ્ટ્રેટ (SDM) અને પોલીસનો કાફલો ઘટનાસ્થળે પહોંચ્યો હતો. અકસ્માતનું ચોક્કસ કારણ જાણવા આગળની તપાસ હાથ ધરવામાં આવે તેવી શક્યતા છે.
પેસેન્જર રોપ-વે સેવા ચાલુ
માલવાહક રોપ-વેમાં સર્જાયેલી આ દુર્ઘટના વચ્ચે તંત્ર દ્વારા સ્પષ્ટતા કરવામાં આવી છે કે મુસાફરોને લઈ જતી પેસેન્જર રોપ-વે સેવા રાબેતા મુજબ ચાલુ છે. એટલે કે, હાલની માહિતી પ્રમાણે અકસ્માત માલસામાન પરિવહન માટેના રોપ-વેમાં થયો હતો.
નવરાત્રિમાં વહેલી સવારથી રોપ-વે સેવા
નવરાત્રિ દરમિયાન પાવાગઢમાં ભક્તોની વધતી ભીડને ધ્યાનમાં રાખીને રોપ-વે સેવાના સમયમાં ફેરફાર કરવામાં આવ્યો છે. સામાન્ય દિવસોમાં સવારે 5 વાગ્યે શરૂ થતી સેવા નવરાત્રિ દરમિયાન સવારે 4 વાગ્યાથી શરૂ થાય છે.
મળતી માહિતી મુજબ, એકમ, ત્રીજ, સાતમ, આઠમ, નોમ, તેરસ, ચૌદસ અને પૂનમ જેવા વિશેષ દિવસોમાં રોપ-વે સેવા સવારે 4 વાગ્યાથી રાત્રે 9 વાગ્યા સુધી ચાલુ રાખવાનું આયોજન છે. આ દરમિયાન મોટી સંખ્યામાં માઈભક્તો માતાજીનાં દર્શન માટે પાવાગઢ પહોંચી રહ્યા છે.
