નાયબ મુખ્યમંત્રી હર્ષ સંઘવીએ રાજકોટ ગ્રામ્ય પોલીસની કામગીરીને બિરદાવી; 500થી વધુ વિઘા જમીનના 55 દસ્તાવેજો મૂળ માલિકોને સોંપાયા, રાજકોટ જિલ્લા પોલીસને ISO 9001:2015 પ્રમાણપત્ર મળ્યું
રાજકોટ, તા. 16: શાપર ખાતે નવનિર્મિત ડીવાયએસપી કચેરીનું નાયબ મુખ્યમંત્રી હર્ષ સંઘવીના હસ્તે લોકાર્પણ કરવામાં આવ્યું હતું. આ પ્રસંગે ભૂમાફિયા અને વ્યાજખોરો સામેની કાર્યવાહી દરમિયાન મુક્ત કરાવાયેલી 500થી વધુ વિઘા જમીનના 55 દસ્તાવેજો 35 જેટલા ખેડૂતોને પરત સોંપવામાં આવ્યા હતા. આ જમીનની કિંમત રૂ.100 કરોડથી વધુ હોવાનું જણાવાયું હતું. આ સાથે રાજકોટ ગ્રામ્ય પોલીસની પ્રજાભિમુખ કામગીરી અને વહીવટી પારદર્શિતાને ધ્યાનમાં રાખીને સમગ્ર જિલ્લા પોલીસ તંત્રને ISO 9001:2015 પ્રમાણપત્ર પણ એનાયત કરવામાં આવ્યું હતું.
કાર્યક્રમને સંબોધતાં નાયબ મુખ્યમંત્રી હર્ષ સંઘવીએ જણાવ્યું હતું કે ગુજરાત સરકાર વ્યાજખોરીના દૂષણ સામે નિર્ણાયક લડાઈ લડવા માટે કટિબદ્ધ છે. તેમણે રાજકોટ પોલીસને અભિનંદન પાઠવતાં કહ્યું હતું કે 35 ખેડૂતોની જીવનભરની મૂડી સમાન જમીન પરત અપાવવાની કામગીરી નોંધપાત્ર છે. તેમના જણાવ્યા અનુસાર, આટલા મોટા પ્રમાણમાં ખેડૂતોને જમીન પરત અપાવવાનો આ દેશના ઇતિહાસમાં પ્રથમ કિસ્સો છે.
સંઘવીએ ખેડૂતોને અપીલ કરી હતી કે તેઓ ઊંચા વ્યાજે નાણાં આપતા તત્ત્વોથી સાવચેત રહે અને મુશ્કેલીના સમયમાં સરકારની વિવિધ કલ્યાણકારી યોજનાઓનો લાભ લે. તેમણે કહ્યું હતું કે ખેડૂતો આખી જિંદગી મહેનત કરીને પરિવારનું ગુજરાન ચલાવે છે, પરંતુ કેટલાક વ્યાજખોરો અને ભૂમાફિયાઓ નાણાકીય મુશ્કેલીનો ગેરલાભ ઉઠાવી તેમની જમીન પચાવી પાડવાનો પ્રયાસ કરે છે. દસ્તાવેજો પર સહી કરતી વખતે પૂરતી સાવચેતી રાખવી જરૂરી છે, કારણ કે બેદરકારીને કારણે ભવિષ્યમાં કાનૂની મુશ્કેલીઓ ઊભી થઈ શકે છે.
‘તેરા તુજકો અર્પણ’ અભિયાન હેઠળ જમીનના દસ્તાવેજો પરત
રાજકોટ પોલીસ દ્વારા સબ-રજિસ્ટ્રાર કચેરીના સહયોગથી ચલાવવામાં આવેલી ઝુંબેશ અંતર્ગત છેતરપિંડી અને દગાબાજીથી પડાવી લેવાયેલી જમીનો મૂળ માલિક ખેડૂતોને પરત સોંપવામાં આવી હતી. ‘તેરા તુજકો અર્પણ’ અભિયાન હેઠળ 35 જેટલા ખેડૂતોને 500થી વધુ વિઘા જમીનના 55 દસ્તાવેજો સન્માનપૂર્વક આપવામાં આવ્યા હતા. આ જમીનની અંદાજિત કિંમત રૂ.100 કરોડથી વધુ હોવાનું જણાવાયું હતું.
કાર્યક્રમમાં કુખ્યાત વ્યાજખોર અને ભૂમાફિયા તરીકે ઓળખાવવામાં આવેલા અલ્પેશ ડોંગા સામેની કાર્યવાહીનો પણ ઉલ્લેખ થયો હતો. રાજકોટ સહિત સૌરાષ્ટ્રના વિવિધ વિસ્તારોના ખેડૂતોની જમીનો પચાવી પાડવા સંબંધિત કેસોમાં વિજયસિંહ ગુર્જર અને તેમની ટીમે કાર્યવાહી કરી હતી. આ કામગીરીના પરિણામે ખેડૂતોની જમીનો પરત અપાવવામાં સફળતા મળી હોવાનું જણાવાયું હતું.
નાયબ મુખ્યમંત્રી હર્ષ સંઘવીએ પોલીસ અધિકારીઓ અને ખાસ કરીને વિજયસિંહ ગુર્જરની કામગીરીને બિરદાવી હતી. તેમણે નિર્લિપ્ત રાય અને તેમની ટીમને અભિનંદન આપતાં વિજયસિંહ ગુર્જરને સંબોધીને કહ્યું હતું કે, “તમે જેટલાં મંદિરોમાં જશો, એટલા આશીર્વાદ નહીં મળે, જેટલા આજે તમને મળ્યા છે.” ખેડૂતોને તેમની જમીન પરત અપાવવાની કામગીરીને લઈને તેમણે આ શબ્દોમાં પ્રશંસા વ્યક્ત કરી હતી.
રાજકોટ જિલ્લા પોલીસને ISO પ્રમાણપત્ર
રાજકોટ ગ્રામ્ય પોલીસની ફરિયાદ નિવારણ પ્રક્રિયા, રેકોર્ડ મેનેજમેન્ટ, ડિજિટાઇઝેશન અને પારદર્શક વહીવટની નોંધ લઈને જિલ્લા પોલીસને ISO 9001:2015 પ્રમાણપત્ર એનાયત કરવામાં આવ્યું હતું. તમામ પોલીસ સ્ટેશનો અને શાખાઓને આવરી લેતું આ આંતરરાષ્ટ્રીય સ્તરનું પ્રમાણપત્ર મેળવનારો રાજકોટ જિલ્લો ગુજરાતમાં પ્રથમ બન્યો હોવાનું કાર્યક્રમમાં જણાવાયું હતું.
આ ઉપરાંત, આત્મહત્યા જેવા નકારાત્મક વિચારોમાંથી લોકોને બહાર લાવવા અને તેમને નવું જીવન જીવવા માટે પ્રેરિત કરવાના હેતુથી રાજકોટ ગ્રામ્ય પોલીસે ‘પ્રેરણા—નવા જીવનની’ પહેલ હાથ ધરી છે. આ પહેલ હેઠળ 700થી વધુ લોકોને કાઉન્સેલિંગ દ્વારા મદદ પૂરી પાડવામાં આવી હોવાનું જણાવાયું હતું. આ કામગીરીને લગતા અહેવાલનું પણ કાર્યક્રમમાં વિમોચન કરવામાં આવ્યું હતું.
ઔદ્યોગિક વિસ્તારની સુરક્ષામાં વધારો થશે
શાપર, પડવલા અને હડમતાળા ઇન્ડસ્ટ્રીયલ એસોસિએશનના સહયોગથી નિર્માણ પામેલી નવી ડીવાયએસપી કચેરી કાર્યરત થવાથી શાપર-વેરાવળ સહિતના ઔદ્યોગિક અને ગ્રામ્ય વિસ્તારોમાં કાયદો અને વ્યવસ્થાની કામગીરી વધુ સુદૃઢ બનવાની અપેક્ષા છે. સ્થાનિક નાગરિકો અને ઉદ્યોગકારોને પોલીસની સેવાઓ ઝડપથી મળી રહે તે દિશામાં આ કચેરી મહત્ત્વપૂર્ણ સાબિત થઈ શકે છે. નાયબ મુખ્યમંત્રીએ દીપ પ્રાગટ્ય કરીને કચેરીનું લોકાર્પણ કર્યું હતું.
કાર્યક્રમ પહેલાં રાજકોટ જિલ્લા પોલીસ દ્વારા નાયબ મુખ્યમંત્રીને ગાર્ડ ઓફ ઓનર આપવામાં આવ્યું હતું. જમીન પરત મેળવનારા ખેડૂતોએ રાજ્ય સરકાર અને પોલીસ વિભાગનો આભાર વ્યક્ત કર્યો હતો. આ પ્રસંગે સાંસદ પરસોત્તમભાઈ રૂપાલા, જિલ્લા પંચાયત પ્રમુખ સંજયભાઈ પીપળીયા, ધારાસભ્યો ભાનુબેન બાબરીયા, રમેશભાઈ ટીલાળા, ગીતાબા જાડેજા, જયેશભાઈ રાદડિયા, ઉદયભાઈ કાનગડ, ડૉ. મહેન્દ્રભાઈ પાડલીયા, દુર્લભજીભાઈ દેથરિયા સહિતના પદાધિકારીઓ અને રેન્જ આઈજી નિર્લિપ્ત રાય, જિલ્લા કલેક્ટર ડૉ. ઓમ પ્રકાશ તથા જિલ્લા વિકાસ અધિકારી અનંદુ સુરેશ ગોવિંદ સહિતના અધિકારીઓ ઉપસ્થિત રહ્યા હતા.
