ગત વર્ષે 22માંથી 10 નમૂના ફેઇલ થયા હતા, આ વખતે પાલિકાની 15 ટીમો મેદાનમાં ઉતરી
સુરત: ગત વર્ષે ઘારી બનાવવા વપરાતા માવામાં ભેળસેળ અને વેજિટેબલ ફેટનું વધુ પ્રમાણ મળી આવતાં ઊભા થયેલા વિવાદ બાદ આ વર્ષે ચંદની પડવાના તહેવાર પહેલાં જ મહાનગરપાલિકાના ફૂડ વિભાગે તપાસ તેજ કરી છે. પાલિકાની આશરે 15 ટીમોએ ભાગળ, વરાછા, કતારગામ, ઘોડદોડ રોડ અને રાંદેર સહિતના વિસ્તારોમાં માવાનું વેચાણ કરતી દુકાનોમાંથી નમૂના એકત્ર કરીને લેબોરેટરી પરીક્ષણ માટે મોકલવાની કામગીરી હાથ ધરી છે.
સુરતમાં ચંદની પડવાના તહેવારનું વિશેષ મહત્ત્વ હોવાથી આ દિવસે ઘારી અને ભૂસાની માગમાં મોટો વધારો થાય છે. ઘારી બનાવવા માટે માવો મુખ્ય ઘટક હોવાથી તેની ગુણવત્તા જળવાઈ રહે અને ભેળસેળયુક્ત માવાથી લોકોના આરોગ્યને નુકસાન ન થાય તે હેતુથી ફૂડ વિભાગ દ્વારા તપાસ હાથ ધરવામાં આવી છે.
ફૂડ વિભાગની ટીમોએ સવારથી જ વિવિધ વિસ્તારોમાં દુકાનોની તપાસ કરી માવાના નમૂના એકત્ર કર્યા હતા. આ નમૂનાઓના લેબોરેટરી અહેવાલના આધારે આગળની કાર્યવાહી કરવામાં આવશે. જો કોઈ નમૂનો નિર્ધારિત ધોરણો મુજબ નહીં હોય અથવા ભેળસેળ જણાશે તો સંબંધિત વેપારીઓ સામે નિયમ મુજબ પગલાં લેવામાં આવશે. આગામી દિવસોમાં પણ તપાસ ચાલુ રાખવામાં આવશે.
દરમિયાન, દશેરા દરમિયાન ફાફડા-જલેબીના લેવામાં આવેલા તમામ નમૂના લેબોરેટરી પરીક્ષણમાં પાસ થયા હોવાનું જાણવા મળ્યું છે. હવે ચંદની પડવા પહેલાં ઘારીમાં વપરાતા માવાના નમૂનાઓના અહેવાલ પર સૌની નજર રહેશે.
ગત વર્ષે 22માંથી 10 નમૂના નિષ્ફળ, 8 સંસ્થાના માવામાં વેજિટેબલ ફેટ વધુ
ગત વર્ષે સુરત મહાનગરપાલિકાના ફૂડ વિભાગે દૂધના માવાના 22 નમૂના એકત્ર કર્યા હતા, જેમાંથી 10 નમૂના લેબોરેટરી પરીક્ષણમાં નિષ્ફળ ગયા હતા. આઠ સંસ્થાના માવામાં વેજિટેબલ ફેટનું પ્રમાણ નિયત ધોરણ કરતાં વધુ મળી આવ્યું હતું. ત્યારબાદ સંબંધિત સંસ્થાઓ સામે કાયદેસરની કાર્યવાહી હાથ ધરવામાં આવી હતી.
2025માં માવાના નમૂના નિષ્ફળ ગયેલી આઠ સંસ્થાઓ:
શંકરલાલ માવાવાલા — તરતિયા હનુમાન મંદિર પાસે, હરિપુરા
શ્રી કૃષ્ણ માવા ભંડાર — ખાંડવાલાની શેરી, વાડી ફળિયા, અંબાજી રોડ
શ્રી ગણેશ ડેરી અને મીઠાઈ — રાધેશ્યામ કોમ્પ્લેક્સ, આશાનગર-2, ઉધના
જય અંબે માવા ભંડાર — ચાચવા શેરી, નાની છીપવાડ, અંબાજી રોડ
અંબા શંકર માવા ભંડાર — ગોપી શેરી, બરાનપુરી ભાગળ
શ્રી કૃષ્ણ ડેરી — ભગુનગર સોસાયટી, એલ.એચ. રોડ, વરાછા
નંદકિશોર એસ. માવાવાલા — કોટ સફીલ રોડ, દેના બેંકની સામે
અમૃત ડેરી ફાર્મ — ધનમોરા કોમ્પ્લેક્સ-ડી, સિંગણપોર રોડ, કતારગામ
તહેવારો દરમિયાન મીઠાઈઓની માગ વધતી હોવાથી ખાદ્ય પદાર્થોની ગુણવત્તા જાળવવા માટે તંત્રની આ તપાસ મહત્ત્વપૂર્ણ બની છે. હવે નવા નમૂનાઓના અહેવાલમાં માવાની ગુણવત્તા અંગે શું બહાર આવે છે તેના પર નજર રહેશે.
