મુંબઈથી અમદાવાદ તરફ જઈ રહેલી વંદે ભારત એક્સપ્રેસ ટ્રેન પર સુરત નજીક અજાણ્યા શખ્સો દ્વારા પથ્થરમારો કરવામાં આવતાં ચકચાર મચી ગઈ છે. ઘટના સમયે ઉત્તર પ્રદેશના રાજ્યપાલ અને ગુજરાતના પૂર્વ મુખ્યમંત્રી આનંદીબેન પટેલ પણ ટ્રેનમાં મુસાફરી કરી રહ્યાં હતાં. તેઓ એક્ઝિક્યુટિવ કોચમાં હાજર હોવાથી સદનસીબે સંપૂર્ણપણે સુરક્ષિત રહ્યા હતા.
મળતી માહિતી મુજબ, સુરત નજીક ટ્રેન પસાર થઈ રહી હતી ત્યારે કેટલાક અજાણ્યા શખ્સોએ ટ્રેન તરફ પથ્થરો ફેંક્યા હતા. પથ્થરમારાના કારણે ટ્રેનના સામાન્ય કોચની કેટલીક બારીઓના કાચ તૂટી ગયા હતા અને અન્ય કાચમાં તિરાડો પડી હતી. ચાલુ ટ્રેન પર થયેલા આ હુમલાથી મુસાફરોમાં પણ ભયનો માહોલ સર્જાયો હતો.
ઘટનાની જાણ થતાં જ રેલવે સુરક્ષા એજન્સીઓ અને રેલવે પ્રોટેક્શન ફોર્સ (RPF) સક્રિય થઈ ગઈ હતી. પ્રાથમિક તપાસના આધારે પોલીસે પથ્થરમારાની ઘટનામાં એક યુવકને ઝડપી લીધો હોવાનું જાણવા મળ્યું છે. તેની પૂછપરછ કરીને પથ્થરમારો કયા કારણોસર કરવામાં આવ્યો હતો અને તેની પાછળ કોઈ ચોક્કસ હેતુ હતો કે કેમ તે અંગે તપાસ કરવામાં આવી રહી છે.
વડોદરા રેલવે મંડળના જનસંપર્ક અધિકારી દ્વારા પણ ઘટનાની માહિતી આપવામાં આવી છે. રેલવે પોલીસ દ્વારા આસપાસના વિસ્તારોમાં તપાસ હાથ ધરવામાં આવી છે અને અન્ય કોઈ વ્યક્તિની સંડોવણી છે કે કેમ તે અંગે પણ તપાસ ચાલી રહી છે.
વંદે ભારત જેવી પ્રીમિયમ ટ્રેન પર ચાલુ માર્ગે પથ્થરમારાની ઘટના ફરી એકવાર રેલવે મુસાફરોની સુરક્ષા અંગે ગંભીર સવાલો ઊભા કરે છે. ખાસ કરીને ટ્રેનમાં મહત્વપૂર્ણ વ્યક્તિ મુસાફરી કરી રહી હોવા છતાં પથ્થરમારો થતાં સુરક્ષા વ્યવસ્થાને લઈને રેલવે તંત્ર વધુ સતર્ક બન્યું છે.
આનંદીબેન પટેલ ગુજરાતના પ્રથમ મહિલા મુખ્યમંત્રી રહી ચૂક્યાં છે. તેઓ અગાઉ મધ્યપ્રદેશના રાજ્યપાલ તરીકે પણ સેવા આપી ચૂક્યાં છે અને હાલમાં ઉત્તર પ્રદેશના રાજ્યપાલ તરીકે જવાબદારી સંભાળી રહ્યાં છે. ઘટનાને પગલે રેલવે પોલીસ અને સુરક્ષા દળોએ તપાસ વધુ તેજ કરી છે.
