વાસી બટેટા, દાઝેલું તેલ, સડેલા શાકભાજી અને અશુદ્ધ પાણી સહિતનો જથ્થો જપ્ત; રૂ.15,750નો દંડ વસૂલાયો
રાજકોટ: જન્માષ્ટમીના પ્રસિદ્ધ લોકમેળામાં લાખો મુલાકાતીઓના આરોગ્યને ધ્યાનમાં રાખીને મહાનગરપાલિકાના ફૂડ વિભાગ દ્વારા સઘન ચેકિંગ હાથ ધરવામાં આવ્યું હતું. તા. 2થી 6 સપ્ટેમ્બર દરમિયાન મેળા પરિસરમાં આવેલા ખાદ્યચીજોના સ્ટોલ અને ફેરિયાઓની તપાસ કરવામાં આવી હતી. કાર્યવાહી દરમિયાન મોટી માત્રામાં અખાદ્ય અને આરોગ્ય માટે હાનિકારક ખોરાક મળી આવતા તેનો સ્થળ પર જ નાશ કરવામાં આવ્યો હતો.
વાસી બટેટા અને દાઝેલું તેલ ઝડપાયું
ફૂડ વિભાગની ટીમે વિવિધ ખાદ્ય સ્ટોલની તપાસ દરમિયાન વાસી બટેટા, વારંવાર ઉપયોગમાં લેવાયેલું દાઝેલું તેલ અને સડેલા શાકભાજી સહિતનો અખાદ્ય જથ્થો ઝડપી પાડ્યો હતો. આ ઉપરાંત વાસી ઘૂઘરા-ચટણી તેમજ પાણીપુરી માટે ઉપયોગમાં લેવાતું અશુદ્ધ પાણી પણ મળી આવ્યું હતું.
417 કિલો અખાદ્ય જથ્થાનો સ્થળ પર નાશ
ચેકિંગ દરમિયાન કુલ અંદાજે 417 કિલો અખાદ્ય ખાદ્યસામગ્રી જપ્ત કરવામાં આવી હતી. ફૂડ વિભાગે જપ્ત કરાયેલા આ તમામ જથ્થાનો સ્થળ પર જ નાશ કર્યો હતો. સાથે જ નિયમોનું ઉલ્લંઘન કરનારા વેપારીઓ સામે દંડાત્મક કાર્યવાહી કરીને રૂ.15,750નો દંડ વસૂલવામાં આવ્યો હતો.
મેળામાં ખાદ્ય ગુણવત્તા પર તંત્રની નજર
લોકમેળામાં મોટી સંખ્યામાં લોકો ખાણીપીણીની વસ્તુઓની ખરીદી કરતા હોવાથી ખાદ્યસામગ્રીની ગુણવત્તા અને સ્વચ્છતા જળવાય તે માટે ફૂડ વિભાગ દ્વારા સતત ચેકિંગ કરવામાં આવ્યું હતું. અખાદ્ય સામગ્રીનો ઉપયોગ કરતા વેપારીઓ સામે કાર્યવાહી કરી તંત્રએ મેળામાં મુલાકાતીઓના આરોગ્ય સાથે ચેડા ન થાય તે માટે કડક વલણ અપનાવ્યું હતું.
