રાજકોટ: રાજકોટમાં ઇન્ડોનેશિયન કોલસાના વેપારના નામે રોકાણ કરાવી પાંચ ઉદ્યોગકારો સહિત અનેક રોકાણકારો સાથે રૂ.144.19 કરોડની છેતરપિંડી થયાનો ગંભીર આક્ષેપ સામે આવ્યો છે. ટર્નરેસ્ટ રીસોર્સીસ પ્રા.લિ.માં રોકાણ કરાવી પાંચ વર્ષ બાદ ઊંચું વળતર આપવાની લાલચ આપવામાં આવી હોવાનો ફરિયાદમાં ઉલ્લેખ છે. આ મામલે રાજકોટ આર્થિક ગુના નિવારણ શાખાએ GPID એક્ટ સહિતની ગંભીર કલમો હેઠળ ગુનો નોંધી તપાસ શરૂ કરી છે.
ફરિયાદમાં ટર્નરેસ્ટ રીસોર્સીસના ડિરેક્ટરો જય ચોટલીયા, મિતેષ સંઘવી અને મનીષ ડાંગીના નામનો ઉલ્લેખ કરવામાં આવ્યો છે. ફરિયાદી મુજબ, જય ચોટલીયા તેમના મિત્ર અરવિંદભાઈ રામાણીના CA અને આર્થિક સલાહકાર તરીકે કામ કરતા હતા. વર્ષ 2021 દરમિયાન અરવિંદભાઈ રામાણી મારફતે ટર્નરેસ્ટ રીસોર્સીસમાં રોકાણ અંગે તેમને માહિતી આપવામાં આવી હતી.
પાંચ વર્ષ બાદ ઊંચું વળતર આપવાની લાલચ
ફરિયાદ મુજબ, આરોપીઓએ કંપની ઇન્ડોનેશિયાથી મોટા પ્રમાણમાં કોલસો આયાત કરી દેશભરમાં વેચતી હોવાનું જણાવી રોકાણ માટેની વિવિધ સ્કીમ સમજાવી હતી. રોકાણકારો કંપનીના શેર ખરીદી શકે અથવા પોતાની મિલકત બેંકમાં ગીરવે રાખીને કંપની માટે લોન/CC મેળવી શકે તેવી વ્યવસ્થા હોવાનું જણાવાયું હતું.
કંપનીનું ટર્નઓવર આગામી પાંચ વર્ષમાં રૂ.1,500થી રૂ.2,000 કરોડ સુધી પહોંચશે અને નફામાંથી રોકાણકારોને ઊંચું વળતર આપવાની સાથે તેમની ડિપોઝિટ પરત કરવાની તથા ગીરવે મૂકેલી મિલકતો છોડાવવાની ખાતરી આપવામાં આવી હોવાનો ફરિયાદમાં આક્ષેપ છે.
ત્રણ સ્કીમમાં કરોડોનું રોકાણ
ફરિયાદ મુજબ વર્ષ 2018થી 2023 દરમિયાન વિવિધ રોકાણકારોએ ત્રણ અલગ-અલગ સ્કીમ મારફતે કંપનીમાં નાણાં અને મિલકતોનું રોકાણ કર્યું હતું. તેમાં મિલકત ગીરવે મૂકવી, શેર ખરીદવા અને ડિપોઝિટ સ્વરૂપે નાણાં આપવા જેવી વ્યવસ્થાઓનો સમાવેશ થતો હતો.
ફરિયાદમાં જણાવ્યા મુજબ ત્રણેય સ્કીમમાં કુલ રૂ.1,44,19,26,000નું રોકાણ કરવામાં આવ્યું હતું. જોકે રોકાણકારોને વચન મુજબ રકમ કે વળતર પરત ન મળતાં ફરિયાદ કરવામાં આવી હતી.
ફરિયાદમાં અરવિંદભાઈ રામાણી, કેશુભાઈ બોદર, ખોડાભાઈ બોઘરા, રસિકભાઈ બોદર સહિતના રોકાણકારોની મિલકતો અને રોકાણનો પણ ઉલ્લેખ કરવામાં આવ્યો છે.
મિલકત છોડાવવા રૂ.41 કરોડ ભર્યાનો આક્ષેપ
ફરિયાદ મુજબ અરવિંદભાઈ રામાણીએ પોતાની અવધ ઈન્ફ્રાસ્ટ્રક્ચર કંપનીની મિલકતો ગીરવે મૂકી રોકાણ કર્યું હતું. ટર્નરેસ્ટ રીસોર્સીસની લોન/CCની જવાબદારીના કારણે પોતાની મિલકતો છોડાવવા માટે તેમને 11 સપ્ટેમ્બર 2024ના રોજ રૂ.41 કરોડ બેંકમાં ભરવા પડ્યા હોવાનો પણ આક્ષેપ કરવામાં આવ્યો છે.
બનાવટી સહી અને દસ્તાવેજોના આક્ષેપ
ફરિયાદમાં વધુમાં આક્ષેપ કરવામાં આવ્યો છે કે કેટલાક રોકાણકારોની જાણ બહાર તેમના નામે બોગસ સહી અને દસ્તાવેજોના આધારે બેંક લોન/CCનું રિન્યુઅલ કરવામાં આવ્યું હતું. આ અંગે બેંકના દસ્તાવેજો અને અન્ય પુરાવાના આધારે તપાસ હાથ ધરવામાં આવી રહી છે.
બીજી તરફ, બેંકો દ્વારા લોનની રકમની પરતફેર ન થતાં ચાર્ટર્ડ એકાઉન્ટન્ટ મારફતે ફોરેન્સિક ઓડિટ કરાવવામાં આવ્યું હોવાનો પણ ફરિયાદમાં ઉલ્લેખ છે. ઓડિટ દરમિયાન કંપનીની રકમ અન્ય કંપનીઓ તથા પરિવારના સભ્યોના ખાતામાં ટ્રાન્સફર કરવામાં આવી હોવાના આક્ષેપો સામે આવ્યા હોવાનું જણાવાયું છે.
અમદાવાદમાં પણ રૂ.64 કરોડની લોનનો આક્ષેપ
આ જ કેસ સાથે જોડાયેલા આક્ષેપોમાં અમદાવાદમાં પણ રૂ.64 કરોડની લોન સંબંધિત ગેરરીતિનો ઉલ્લેખ છે. ફરિયાદી કેશુભાઈ બોદરના આક્ષેપ મુજબ, તેમની જાણ બહાર આવકવેરા રિટર્ન અને ઓળખના દસ્તાવેજોનો ઉપયોગ કરી બેંકના ગેરંટી ડીડ અને KYC દસ્તાવેજોમાં કથિત બનાવટી સહી કરવામાં આવી હતી.
આ દસ્તાવેજોના આધારે તેમને જાણ બહાર રૂ.64 કરોડની લોનમાં ગેરંટર બનાવવામાં આવ્યા હોવાનો આક્ષેપ છે. આ મામલે અમદાવાદ ક્રાઇમ બ્રાન્ચે પણ કાર્યવાહી કરી આરોપીઓને ઝડપી પાડ્યા હોવાની માહિતી ફરિયાદમાં આપવામાં આવી છે.
હાલ સમગ્ર મામલે પોલીસ દ્વારા રોકાણકારોના નિવેદનો, બેંકના દસ્તાવેજો, લોન-CCના રેકોર્ડ અને કંપનીના નાણાકીય વ્યવહારોની તપાસ કરવામાં આવી રહી છે.
