ગાંધીનગરની ગિફ્ટ સિટીમાં વાઇન એન્ડ ડાઇન ફેસિલિટી શરૂ થયા બાદ વિદેશી દારૂના વેચાણમાં મોટો ઉછાળો નોંધાયો છે. વિધાનસભામાં રજૂ કરાયેલી સરકારી માહિતી મુજબ, 2024-25માં 3,716.28 લિટરથી વધીને 2025-26માં 55,638.19 લિટર વિદેશી દારૂનું વેચાણ થયું, એટલે કે એક જ વર્ષમાં વેચાણ લગભગ 15 ગણું વધ્યું છે.
ગિફ્ટ સિટીના વ્યાપ અને આંતરરાષ્ટ્રીય વ્યવસાયને ધ્યાનમાં રાખીને ડિસેમ્બર 2023માં વાઇન એન્ડ ડાઇન ફેસિલિટી શરૂ કરવામાં આવી હતી. હોટેલ, રેસ્ટોરન્ટ અને ક્લબ સહિતના નિર્ધારિત સ્થળોએ મંજૂરી ધરાવતા કર્મચારીઓ તથા બહારથી આવતા લોકોને બેસીને દારૂ પીવાની સુવિધા આપવામાં આવે છે.
કોંગ્રેસના ધારાસભ્યના પ્રશ્નના જવાબમાં ગૃહ વિભાગે જણાવ્યું હતું કે, 1 ઓગસ્ટ 2024થી 31 જુલાઈ 2025 દરમિયાન 3,716.28 લિટર દારૂ વેચાયો હતો. જ્યારે 1 ઓગસ્ટ 2025થી 31 જુલાઈ 2026 દરમિયાન વેચાણ વધીને 55,638.19 લિટર થયું હતું.
આમ, બે વર્ષના સમયગાળામાં ગિફ્ટ સિટીમાં 60 હજાર લિટરથી વધુ વિદેશી દારૂનું વેચાણ નોંધાયું છે. આ વેચાણમાંથી સરકારને બે વર્ષમાં ₹87.39 લાખથી વધુની આવક થઈ હોવાનું પણ વિધાનસભામાં જણાવાયું છે.
