વિહળધામ પાળીયાદમાં 52 ગજની ધ્વજા ચઢાવાઈ : ભક્તિ, ધ્વજારોહણ અને ગૌસેવાનો અદ્ભુત સમન્વય
પાળીયાદ, તા. 11 સપ્ટેમ્બર 2026: પ્રસિદ્ધ વિહળધામ પાળીયાદમાં અમાસના પવિત્ર દિવસે ધાર્મિક શ્રદ્ધા અને ભક્તિનું વિશેષ વાતાવરણ જોવા મળ્યું હતું. અમાસના દિવસે પિતૃસ્મરણ, તર્પણ, દાન-પુણ્ય, ભગવાનની આરાધના તેમજ ગૌસેવાનું વિશેષ ધાર્મિક મહત્ત્વ માનવામાં આવે છે. જેના પગલે પાળીયાદમાં મોટી સંખ્યામાં શ્રદ્ધાળુઓ દર્શન-પૂજન માટે ઉમટી પડ્યા હતા.
અમાસના પવિત્ર પ્રસંગે ભક્તોએ પરમ પૂજ્ય શ્રી રાઘવેન્દ્ર સરકાર, પરમ પૂજ્ય શ્રી વિહળાનાથ તથા પ.પૂ. શ્રી શ્રી ૧૦૦૮ મહામંડલેશ્વર નિર્મળાબાના આશીર્વાદ મેળવી ધન્યતા અનુભવી હતી. વર્ષોથી ચાલી આવતી પરંપરા મુજબ વિવિધ ધાર્મિક વિધિઓ અને ભગવાનના વિશેષ શણગાર સાથે પરિસરમાં આધ્યાત્મિક માહોલ છવાયો હતો.
52 ગજની ધ્વજા ચઢાવાઈ
અમાસના દિવસે પરંપરાગત વિધિ-વિધાન અને મંત્રોચ્ચાર સાથે 52 ગજની ધ્વજા ચઢાવવામાં આવી હતી. ધ્વજારોહણ તથા રસોઈના પ્રથમ યજમાન તરીકે શ્રી જીવરાજભાઈ નરસિંહભાઈ તુરખિયા અને પરિવાર, મૂળ ગામ બગડ અને હાલ વડોદરા, ઉપસ્થિત રહ્યા હતા.
બીજા યજમાન તરીકે શ્રી અંબારામભાઈ મોહનભાઈ ગોલાણી તથા સહપરિવાર, ગામ જોબાળા અને ત્રીજા યજમાન તરીકે શ્રી રાજુભાઈ સોંડાભાઈ ભરવાડ, ગામ બરવાળા અને હાલ સુરત ઉપસ્થિત રહ્યા હતા. યજમાનો દ્વારા વિધિવત્ ધ્વજાપૂજન કરવામાં આવ્યું હતું.
યજમાનો દ્વારા ધ્વજાપૂજન પૂર્ણ થયા બાદ જગ્યાના ગાદીપતિ પ.પૂ. શ્રી શ્રી ૧૦૦૮ મહામંડલેશ્વર નિર્મળાબાએ પણ ધ્વજાપૂજન કર્યું હતું. ત્યારબાદ ધાર્મિક વિધિ અને મંત્રોચ્ચાર સાથે 52 ગજની ધ્વજા ચઢાવવામાં આવી હતી.
‘બણક્લ’ નામની એક ગાયથી શરૂ થયેલી ગૌપરંપરા
પાળીયાદની ગૌસેવાની પરંપરા અમાસના આ પ્રસંગનું વિશેષ આકર્ષણ બની હતી. પૂજ્ય શ્રી વિસામણબાપુ પાસે ‘બણક્લ’ નામની એક ગાય હતી. એક ગાયથી શરૂ થયેલી આ ગૌપરંપરા આજે વિસ્તરીને 750થી વધુ ગાયોના ગૌધન સુધી પહોંચી હોવાનું જણાવાયું છે.
આ ગૌપરંપરાને ઉજાગર કરવા અમાસના દિવસે પાળીયાદમાં ગાયોનો વિશેષ અને ભવ્ય શણગાર કરવામાં આવ્યો હતો. વિવિધ રીતે સજાવવામાં આવેલી ગાયોના દર્શન માટે શ્રદ્ધાળુઓમાં પણ ખાસ ઉત્સાહ જોવા મળ્યો હતો. ગૌમાતાના શણગારે સમગ્ર પરિસરમાં ગૌપ્રેમ અને ગૌસેવાનો સંદેશ પ્રસરાવ્યો હતો.
ભયલુબાપુના માર્ગદર્શન હેઠળ ગૌસંવર્ધન
ગૌસેવા અને ગૌમાતાના સંવર્ધનની આ પરંપરાને આગળ વધારવામાં પૂજ્ય શ્રી ભયલુબાપુના ગૌપ્રેમ, માર્ગદર્શન અને દિશાદર્શનને મહત્વપૂર્ણ ગણાવવામાં આવે છે. તેમના માર્ગદર્શન હેઠળ ગૌવંશના યોગ્ય જતન, સંભાળ, સંવર્ધન અને વિકાસ માટે સતત કામગીરી કરવામાં આવી રહી છે.
એક ગાયથી શરૂ થયેલી ગૌપરંપરા આજે 750થી વધુ ગાયો સુધી પહોંચવી એ ગૌસેવા અને ગૌસંવર્ધનની લાંબી પરંપરાનું પ્રતીક બની છે. પૂજ્ય શ્રી વિસામણબાપુની ગૌપ્રેમની પરંપરાને પૂજ્ય શ્રી ભયલુબાપુના માર્ગદર્શન હેઠળ વધુ સુવ્યવસ્થિત રીતે આગળ ધપાવવામાં આવી રહી છે.
અમાસના દિવસે ભગવાનના વિશેષ શણગાર સાથે ગૌમાતાના ભવ્ય શણગારને પણ વિશેષ સ્થાન મળતાં પાળીયાદમાં ધાર્મિક પરંપરા, ધ્વજારોહણ, ગૌસેવા અને સંસ્કૃતિનો સુંદર સંગમ જોવા મળ્યો હતો. 52 ગજની પવિત્ર ધ્વજા અને 750થી વધુ ગાયોના શણગારે અમાસના આ ધાર્મિક પ્રસંગને વિશેષ યાદગાર બનાવી દીધો હતો.
