અમદાવાદના સરદાર વલ્લભભાઈ પટેલ આંતરરાષ્ટ્રીય એરપોર્ટ પર આજે (14 સપ્ટેમ્બર) વિવિધ એરલાઇન્સની ફ્લાઇટ્સ રદ થતાં મુસાફરો ભારે મુશ્કેલીમાં મુકાયા હતા. સ્ટાર એર અને ઇન્ડિગોની અમદાવાદ-દીવ રૂટની ફ્લાઇટ્સ તેમજ અકાસા એરની અમદાવાદ-કોલકાતા સેક્ટરની ફ્લાઇટ્સ રદ થતાં એરપોર્ટ પર મુસાફરોમાં ભારે રોષ જોવા મળ્યો હતો.
સ્ટાર એરની ફ્લાઇટ રદ થતાં મુસાફરો અટવાયા
અમદાવાદથી દીવ થઈ ગોવા જતી સ્ટાર એરની ફ્લાઇટ S5 424 અચાનક રદ કરવામાં આવતાં મુસાફરો એરપોર્ટ પર અટવાઈ ગયા હતા. મુસાફરોના જણાવ્યા મુજબ, વૈકલ્પિક વ્યવસ્થા માટે તેમણે એરલાઇનના સિનિયર અધિકારીઓ સમક્ષ રજૂઆત કરી હતી, પરંતુ સંતોષકારક જવાબ મળ્યો નહોતો.
ફ્લાઇટ રદ થવા અંગે સ્પષ્ટ માહિતી અને યોગ્ય મદદ ન મળતાં મુસાફરોમાં ભારે નારાજગી જોવા મળી હતી. મુસાફરોએ એરલાઇનના સ્ટાફની કામગીરી સામે આક્રોશ વ્યક્ત કરી મુશ્કેલીમાં મુકાયેલા મુસાફરો માટે તાત્કાલિક વૈકલ્પિક વ્યવસ્થા કરવાની માંગ કરી હતી.
અમદાવાદ-દીવ અને કોલકાતા રૂટ પણ પ્રભાવિત
ફ્લાઇટ્સ રદ થવાની અસર માત્ર સ્ટાર એર સુધી મર્યાદિત રહી નહોતી. અન્ય એરલાઇન્સની સેવાઓ પણ પ્રભાવિત થઈ હતી.
સ્ટાર એર: અમદાવાદથી દીવ જતી સવારેની અને સાંજે પરત આવતી બંને ફ્લાઇટ્સ રદ રહી હતી.
ઇન્ડિગો: અમદાવાદ-દીવ વચ્ચેની આવતી અને જતી બંને ફ્લાઇટ્સ રદ કરવામાં આવી હતી.
અકાસા એર: અમદાવાદથી કોલકાતા જતી તેમજ કોલકાતાથી અમદાવાદ પરત આવતી ફ્લાઇટ ટેકનિકલ કારણોસર રદ કરવામાં આવી હોવાનું સામે આવ્યું છે.
એકસાથે અનેક ફ્લાઇટ્સ રદ થતાં અમદાવાદ એરપોર્ટ પર મુસાફરોની હાલાકી વધી હતી. મુસાફરોને ફ્લાઇટ રદ થવા અંગે સમયસર માહિતી અને વૈકલ્પિક વ્યવસ્થા આપવામાં આવે તેવી માંગ ઉઠી હતી.
