96 ખાલી બોટલ, 270 ઢાંકણાં અને 52 સ્ટીકર મળી આવ્યા; 1000 લીટર રસાયણ ગટરમાં ઢોળી નાશ કર્યાનો ખુલાસો
જામનગરના મધુવન સોસાયટી વિસ્તારમાં રસાયણ, કલર અને એસેન્સના મિશ્રણથી ડુપ્લિકેટ દારૂ તૈયાર કરી વેચાણ કરવાની કથિત તૈયારીનો પોલીસ તપાસમાં પર્દાફાશ થયો છે. મકાનમાંથી દારૂ ભરવા માટેની 96 ખાલી પ્લાસ્ટિકની બોટલો, વિવિધ બ્રાન્ડનાં 270 ઢાંકણાં અને 52 સ્ટીકર મળી આવ્યા હતા. તપાસ દરમિયાન આશરે 1000 લીટર રસાયણનો જથ્થો અગાઉ જ ગટરમાં ઢોળી નાશ કરાયો હોવાનું પણ સામે આવ્યું છે.
જામનગર સીટી બી ડિવિઝન પોલીસ મથકના જાણવા જોગ નંબર 10/2026ની તપાસ દરમિયાન મળેલી બાતમીના આધારે એલસીબી અને સીટી બી ડિવિઝન પોલીસે મધુવન સોસાયટીની શેરી નંબર-2માં આવેલા મકાનમાં તપાસ હાથ ધરી હતી. મકાન બંધ હોવાથી પંચોની હાજરીમાં તાળું ખોલી તપાસ કરવામાં આવી હતી.
તપાસ દરમિયાન હોલમાંથી આશરે 750 મિલીની 96 ખાલી પ્લાસ્ટિક બોટલો મળી આવી હતી. ઉપરાંત મેકડોવેલ નંબર-1, યુનાઇટેડ સ્પિરિટ્સ સહિતની બ્રાન્ડના નામ ધરાવતા 270 ઢાંકણાં તથા 750 મિલીની બોટલો પર લગાવવાના વિવિધ બ્રાન્ડના 52 સ્ટીકર મળી આવ્યા હતા. સ્ટીકર પર 42.8 ટકા આલ્કોહોલ સહિતની વિગતો દર્શાવાઈ હતી. એક ખાલી રોયલ ચેલેન્જ ફાઇનસ્ટ પ્રીમિયમ વ્હિસ્કીની કાચની બોટલ પણ મળી આવી હતી.
ત્રણ મહિના અગાઉ ડુપ્લિકેટ દારૂ બનાવવાનું આયોજન
પોલીસ ફરિયાદમાં નોંધાયેલા નિવેદન મુજબ, સમન્દરસિંહ ભરતસિંહ ખટાણા ગુર્જરે તેના મિત્ર અને રાજસ્થાનના વિષ્ણુ ગુર્જર સાથે મળીને આશરે ત્રણ મહિના અગાઉ રસાયણના ઉપયોગથી ડુપ્લિકેટ દારૂ બનાવવાનું આયોજન કર્યું હતું. આ માટે જરૂરી રસાયણ, ખાલી બોટલો, ઢાંકણાં અને વિવિધ બ્રાન્ડના સ્ટીકર એકત્ર કરવામાં આવ્યા હતા.
પોલીસ તપાસ મુજબ વિષ્ણુ ગુર્જરે મુંબઈથી ટ્રાન્સપોર્ટ મારફતે આશરે 1000 લીટર રસાયણ જામનગર મોકલાવ્યું હતું. આ જથ્થો 15 જાન્યુઆરી 2026ના રોજ સમન્દરસિંહે છોડાવ્યો હોવાનું તપાસમાં સામે આવ્યું છે. ખાલી બોટલો, સ્ટીકર અને ઢાંકણાં અલવરથી મોકલવામાં આવ્યા હોવાનું પણ પોલીસ તપાસમાં જણાવાયું છે.
એક લીટર રસાયણમાં દોઢ લીટર પાણી ભેળવવાની તૈયારી
તપાસમાં સામે આવેલી વિગતો મુજબ, એક લીટર રસાયણમાં દોઢ લીટર પાણી તેમજ કલર અને એસેન્સ ભેળવી પ્રવાહી તૈયાર કરવાની યોજના હતી. ત્યારબાદ આ પ્રવાહી અલગ અલગ બ્રાન્ડની દારૂની બોટલોમાં ભરી તેના પર સ્ટીકર લગાવવાની તૈયારી કરવામાં આવી હતી.
પોલીસ કાર્યવાહી પહેલાં રસાયણ અને બોટલોનો નાશ
સમન્દરસિંહના જણાવ્યા આધારે પોલીસે ગુલાબનગર-સત્યસાઇનગર વિસ્તારમાં આવેલા બીજા મકાનની તપાસ કરી હતી, પરંતુ ત્યાં રસાયણનો જથ્થો મળ્યો નહોતો. મકાનની ચાવી રીંકુસિંહ પરશુરામસિંહ કુશવાહા પાસે હોવાનું સામે આવતા તેની પણ પૂછપરછ કરવામાં આવી હતી.
પોલીસ ફરિયાદમાં નોંધાયેલી વિગતો મુજબ, આશરે 1000 લીટર રસાયણ વાહનમાં ભરી હાપા વેલનાથ સોસાયટી ખાતે મકાન નજીકની ગટરમાં ઢોળી નાશ કરવામાં આવ્યું હતું. આ ઉપરાંત ડુપ્લિકેટ દારૂ ભરવા માટેની આશરે 100 ખાલી પ્લાસ્ટિક બોટલો સળગાવી નાશ કરાઈ હોવાનું પણ તપાસમાં બહાર આવ્યું છે.
ગટર અને બળેલી બોટલોના અવશેષોના નમૂના લેવાયા
રસાયણ અને બોટલોનો નાશ કરાયો હોવાની માહિતી મળ્યા બાદ પોલીસે બંને સ્થળે પંચનામું કર્યું હતું. એફએસએલ અધિકારીની હાજરીમાં કાર્યવાહી દરમિયાન બળેલી બોટલોના અવશેષોના નમૂના લેવામાં આવ્યા હતા. ગટરમાંથી રસાયણ જેવી વાસ ધરાવતા પ્રવાહીના પણ નમૂના લઈ વૈજ્ઞાનિક તપાસ માટે મોકલવાની કાર્યવાહી કરવામાં આવી છે.
પોલીસે મકાનમાંથી મળી આવેલા બોટલ, ઢાંકણાં, સ્ટીકર અને અન્ય દસ્તાવેજો કબજે કરી વધુ તપાસ શરૂ કરી છે. ડુપ્લિકેટ દારૂનું વાસ્તવિક ઉત્પાદન થયું હતું કે માત્ર તેના ઉત્પાદનની તૈયારી કરવામાં આવી હતી તથા સમગ્ર પ્રકરણમાં અન્ય કોઈ વ્યક્તિ સંડોવાયેલી છે કે કેમ તે અંગે તપાસ ચાલી રહી છે.
