નવી દિલ્હીઃ ગુજરાતમાં દારૂબંધી અને તેના અમલ વચ્ચે ગેરકાયદે દારૂના વેપાર તથા લઠ્ઠાકાંડના મુદ્દે સુપ્રીમ કોર્ટે ગંભીર સવાલો ઉઠાવ્યા છે. મહારાષ્ટ્રમાં મેથેનોલની ખરીદી અને ઉપયોગને નિયંત્રિત કરતા નિયમો અંગેના કેસની સુનાવણી દરમિયાન કોર્ટે ગુજરાત સહિતના રાજ્યોમાં ઝેરી દારૂથી થયેલા મોતની ઘટનાઓનો ઉલ્લેખ કર્યો હતો.
સુપ્રીમ કોર્ટની ખંડપીઠે સવાલ કર્યો કે દારૂબંધીથી શું હાંસલ થયું? કોર્ટે દારૂબંધીના સંદર્ભમાં સરકારી મહેસૂલી આવકમાં ઘટાડો, કાયદાના અમલ પાછળનો ખર્ચ, પોલીસ ભ્રષ્ટાચાર, ગેરકાયદે દારૂના વેપાર અને ઝેરી દારૂના જોખમ જેવા મુદ્દાઓનો ઉલ્લેખ કર્યો હતો.
કોર્ટે ગુજરાતનું ઉદાહરણ આપતાં જણાવ્યું કે રાજ્યમાં દારૂબંધીની કડક નીતિ હોવા છતાં ગુજરાતની રચના બાદ અનેક વખત લઠ્ઠાકાંડની ઘટનાઓ બની છે અને તેમાં 600થી વધુ લોકોના મોત થયાનો ઉલ્લેખ કર્યો હતો. ભાવનગર સહિતની ઝેરી દારૂની ઘટનાઓને પણ કોર્ટ દ્વારા ચેતવણીરૂપ ગણાવવામાં આવી હતી.
કોર્ટે નોંધ્યું હતું કે દારૂબંધીના કારણે ગેરકાયદે દારૂનો ભૂગર્ભ વેપાર વધે તો ઝેરી દારૂ બનાવવાનું જોખમ પણ વધી શકે છે. સાથે જ કોર્ટે સ્પષ્ટ કર્યું કે સરકારની નીતિના ઈરાદા પર સવાલ નથી, પરંતુ નિયમોનો વાસ્તવિક અમલ અને તેના પરિણામો કેટલા અસરકારક છે તે મહત્વનું છે.
મેથેનોલ સહિત ઝેરી દારૂ બનાવવામાં ઉપયોગમાં લેવાતા અન્ય પદાર્થોના નિયંત્રણ અંગે પણ કોર્ટે સવાલો ઉઠાવ્યા હતા. કોર્ટના અવલોકન મુજબ માત્ર કડક પ્રતિબંધો અથવા નિયંત્રણો લાદવાથી નકલી અને ઝેરી દારૂનું ઉત્પાદન સંપૂર્ણપણે અટકાવી શકાય છે કે નહીં, તે અંગે વ્યવહારુ અસરકારકતા તપાસવી જરૂરી છે.
