ભાદરવી પૂનમે યોજાયેલા પરંપરાગત મેળામાં 300થી વધુ કુસ્તીબાજોએ અજમાવ્યા દાવપેચ, હજારો લોકો બન્યા રોમાંચક મુકાબલાના સાક્ષી
દેવભૂમિ દ્વારકા જિલ્લાના ઓખામંડળ તાલુકાના શિવરાજપુર ગામે ભાદરવી પૂનમના પાવન પર્વે સદીઓ જૂની મલ કુસ્તીની પરંપરા આજે પણ જીવંત જોવા મળી હતી. હજરત જાકૂપીર દાદાની દરગાહ ખાતે યોજાયેલા પરંપરાગત મલ કુસ્તી મેળામાં 300થી વધુ કુસ્તીબાજોએ ભાગ લીધો હતો, જ્યારે રોમાંચક મુકાબલા નિહાળવા હજારો લોકો ઉમટી પડ્યા હતા.
આ મેળો 400 વર્ષથી વધુ સમયથી પરંપરાગત રીતે યોજાતો હોવાનો આયોજકોનો દાવો છે. હિન્દુ-મુસ્લિમ એકતાની ભાવનાનું પ્રતીક ગણાતા આ મેળામાં ઓખામંડળ, બારાડી અને બરડા પંથકમાંથી કુસ્તીબાજો ભાગ લેવા પહોંચે છે.
મેદાનમાં ઉતરેલા કુસ્તીબાજોએ એકબીજા સામે વિવિધ દાવપેચ અજમાવી પોતાની તાકાત, ચપળતા અને કુસ્તીની કળાનું પ્રદર્શન કર્યું હતું. બે પહેલવાનો આમને-સામને આવતા જ મેદાનની આસપાસ હાજર દર્શકોમાં ભારે ઉત્સાહ જોવા મળ્યો હતો. એક પછી એક રોમાંચક મુકાબલાઓને નિહાળવા માટે દૂર-દૂરથી લોકો શિવરાજપુર પહોંચ્યા હતા.
પરંપરાગત માન્યતા મુજબ મલ કુસ્તી માત્ર શારીરિક શક્તિનું પ્રદર્શન નહીં, પરંતુ શિસ્ત, કસરત અને યુવાનોને તંદુરસ્ત જીવન તરફ પ્રેરિત કરતી પરંપરા છે. પ્રાચીન સમયમાં આવા કુસ્તી મેળાઓ દ્વારા યુવાનોને શારીરિક કૌશલ્ય અને યુદ્ધકળા માટે પ્રોત્સાહિત કરવામાં આવતા હોવાની માન્યતા છે.
આધુનિક સમયમાં મોબાઈલ અને ઓનલાઈન ગેમ્સ તરફ વધતા યુવાનોને મેદાન સાથે જોડવા અને શારીરિક કસરત તરફ પ્રોત્સાહિત કરવાનો સંદેશ પણ આ મેળો આપે છે. પરંપરા, રમતગમત, શિસ્ત અને ભાઈચારાનું અનોખું સંગમ બની રહેલો શિવરાજપુરનો મલ કુસ્તી મેળો આજે પણ લોકોમાં આકર્ષણનું કેન્દ્ર છે.
