રાજ્યના સહકાર વિભાગે સહકારી મંડળીઓના હિસાબો અંગે રિ-ઓડિટ અને સ્પેશિયલ ઓડિટ માટે નવી જોગવાઈઓ કરી છે. કોઈ મંડળીના હિસાબોમાં ગેરરીતિ હોવાની અરજી મળે અને રજિસ્ટ્રારને ફરી તપાસ જરૂરી જણાય તો હુકમ કરીને રિ-ઓડિટ કરાવી શકાશે.
રજિસ્ટ્રાર પોતાની રીતે અથવા RBI/રાષ્ટ્રીય બેન્કની ભલામણના આધારે સ્પેશિયલ ઓડિટ પણ કરાવી શકશે. ઓડિટ સંતોષકારક ન જણાય તો સહકારી સંસ્થાનું ફરી ઓડિટ કરાવવાની જોગવાઈ રહેશે.
આ ઉપરાંત સંબંધિત સંસ્થાના નિયામક મંડળના ઠરાવ, 20 ટકા સભાસદોની રજૂઆત અથવા સંલગ્ન સંસ્થાના નિયામક મંડળની રજૂઆતના આધારે પણ રિ-ઓડિટ કે સ્પેશિયલ ઓડિટ કરાવી શકાશે.
રાજ્ય કક્ષાની સહકારી સંસ્થાના કિસ્સામાં રિ-ઓડિટ અથવા સ્પેશિયલ ઓડિટની દરખાસ્તની પૂરતી ચકાસણી બાદ જ તેને ઓડિટરને સોંપવાનો નિર્ણય લેવાશે. રિ-ઓડિટની માંગણી કરતી વખતે ચોક્કસ વર્ષ અને ઓડિટ કરવાના મુદ્દાઓ સ્પષ્ટપણે જણાવવા ફરજિયાત રહેશે.
